Koda-p nersornaasiuttagai

Koda Greenland Awards-imut innersuunneqartut aajuku

Sapaatiummat ualikkut nipilersortartut, Nunatsinni Koda-p 2013-imi 2014-imilu nersornaasiuttagaaik tunineqartussatut innersuunneqartut, kikkuunersut Nuummi Katuami saqqummiunneqarput

Qatanngutigiit Nanook-ut Frederik K. Elsner (saamerleq) Christian K. Elsnerilu (talerperleq) ´2014-imut nersornaammik´ nersornaasigassatut inassutigineqarput saqqummersitaannik ´Pissaaneqaqisut´

Small Time Giants saqqummersitamut ´Stethoscope´, Kimia saqqummersitamut ´Kimia´ kiisalu qatanngutigiit Frederik K. Elsner aamma Christian K. Elsner, nipilersoqatigiinnit Nanook-meersut, saqqummersitamut ´Pissaaneqaqisut´.

Tassa Koda Greenland Awards-ip ingerlanneqarnissaa sioqqullugu ´Ukioq 2014-imut Nersornaammut´ innersuunneqartut.

Nipilersortartut innersuunneqartut saniatigut Koda-p nunatsinni nersornaasiuttagaanik 2013-imut 2014-imullu nersornaaserneqartussat sapaatiummat ualikkut Nuummi kulturip illorsuani Katuami saqqummiunneqarput.

Nittartakkami matumani oqaatigineqareersimasutut nersornaatit marloriaatingajaat tunniunneqassapput, Kodap nersornaasiuttagai januaarip 31-anni tunniussuunneqarpata. Tamatumunnga pissutaavoq nersornaatinik tunniussuseriaaseq nutaaq, tamannalu pissutigalugu 2013-imut 2014-imullu Kodap nersornaatai ukioq manna 2015-imi ataatsimut tunniunneqassapput.

´Ukioq 2013-imut Nersornaammut´ innersuunneqartut tassaapput Kali saqqummersitamut ´Nunarsuup Illuani´, Katsi Kleist saqqummersitamut ´Qujanaq´, aamma Søren Alaufesen saqqummersitamut ´September´, taamatut paasissutissiivoq Kodap naliliinermut ataatsimiititaliaata siulittaasua Juaaka Lyberth.

Isumalluarnartumut nersornaat 2013-14 aamma Ataqqinaammik nersornaat 2013-14

Koda Greenland Awards-ip ´Isumalluarnartumut nersornaat 2013-14´-imut innersuunneqarput Nikolaj Lønstrup, Uyarakq (Aqqalu Engell) aamma Rockstones, ´Ataqqinaammik nersornaat 2013-14´-imullu innersuunneqartut tassaapput Leif Saandvig Immanuelsen, Nuuk Posse aamma Ulf Fleischer.

Nunatsinni erinniortunut taalliortunullu Kodap nersornaasiuttagai maannamiit ukioq allortarlugu januaarip naalermnerani tunniunneqartalissapput. Tamanna pissaaq nipilersornermik festivalip Imernalaaq Nuummi Katuami ingerlanneqarnera peqatigalugu, taannalu ingerlanneqassaaq nipilersortartut kattuffiat aamma Koda Greenland suleqatigalugit.

Powered by Labrador CMS