Københavnimi Kalaallit Illuutaanni Hans Lyngep suliai saqqummersinneqalerput
Aqagu unnukkut saqqummersitsineq 'Hans Lynge – sangen og fortællingerne’ ammarneqassaaq
’Hans Lynge – sangen og fortællingerne’ assilianik aamma qalipakkanik Hans Lyngep nulianit, Inge Lyngemit aamma Hans Lynge Fondenimit inussiarnersumik atukkiunneqartunik saqqummersitsineruvoq.
Hans Lynge (1906-1988) inuusimavoq kulturikkut nuimasoq, atuakkiortutut, naalakkersuinikkut aamma eqqumiitsuliortutut malunnaateqarluarsimasoq. Kalaallit kulturikkut kingornussassaannik aamma piffissami naliminut pimoorussilluartuusimavoq. Eqqumiitsuliortutut inuit oqaluttuatoqqat silarsuaanneersunik atuilluartuusimavoq, tamatumalu ajornartorsiutinut aaqqikkuminaatsunut aaqqiissuteqarnissatsinnut eqqarsaatissiissutissittarpaatigut.
Eqqumiitsuliat saqqummersinneqartut Hans Lyngep oqaluttualianut nammineq allassimasaminut assilialiarpassuisa ilaannik takutitsipput, ilaatigut imilersarissanik qalipagai aamma Grønlands Indre Liv I aamma II aammalu oqaluttualiamut Ersinngitsup piumasaanut assiliartaliunneqarsimasut saqqummersinneqassapput.
Aammattaaq Hans Lyngep uuliamik qalipagai takutinneqassapput, uani saqqummersitsinermi kalaallit erinarsorumatunerannut sammitinneqarluni; kristumiut tussiutaannik aammalu kristumiuussutsip eqqunneqarnera sioqqullugu inngertarnerannut atassuteqartut.
Aqagu marlunngornermi 17.00-mit 19.00 tungaanut saqqummersitsineq ammaanersiorneqassaaq. Saqqummersitat maajip 25-at tikillugu takuneqarsinnaassapput.