Ukiunik qulinngortorsiortoq
Knud Rasmussen Selskabet ukiunik qulinngortorsiorpoq
Claus Oreskov: – Knud Rasmussenip suliai aqqutigalugit Kalaallit Nunaanni Danmarkimilu ataatsimut aallaaveqarpugut inuttut ataatsimooqatigiinnissamut ataqqeqatigiilluni alutoreqatigiillunilu
Knud Rasmussens Selskabet sapaatip akunnerata naanerani ukiunik qulinngortorsiorpoq, selskabip sulinerani inuk pingaarnerpaajusoq, Knud Rasmussen, nersorniarlugu.
Taassuma ernutaa, Knud van Hauen, Københavnimi Vestre Kirkegårdimi Kunuunnguup ilerranut kransiliivoq. Kransip aappaa ilineqarpoq Karoline Madsenimit, taannalu Qaavigrsuup, aamma Mitermik ilisimaneqartup, Knud Rasmussenillu qimussimik angalanersuani peqataasimasup, ernutaraa.
Nersuiniarluni pingaarnerusumillu oqalugiarpoq selskabip siulittaasua Claus Oreskov. Taassuma erseqqissarpaa Knud Rasmussenimit kingornussap qanoq isilluni suli inuit ataqatigiissikkai kulturillu akornanni ataqatigiilersitsilluni:
– Taassuma suliai aqqutigalugit Kalaallit Nunaanni Danmarkimilu ataatsimut aallaaveqarpugut inuttut ataatsimooqatigiinnissamut ataqqeqatigiilluni alutoreqatigiillunilu, Claus Oreskov oqarpoq.
Erinarsoqatigiit Aavaat Københavnip qeqqani kransiliinerit sioqqullugit, nalaanni kingornalu erinarsorput.
Knud Michelsenip, Knud Rasmussenip qatanngutaata arnap Me-p ernutaata, Knud Rasmussenip 17-inik ukioqarluni Birkerød Statsskolimi atualernera oqaluttuaraa.
Tom Høyem, ukiorpassuarni Knud Rasmussen Selskabimi ilaasortaasimasoq, naalagaaffeqatigiinni kingullersaalluni nunatsinnut ministeriusimasoq, eqqaamaasalikkersaarpoq.
Naalagaaffeqatigiinni taakkunani marlunni ataatsimoorussamik sapiitsuliortutuatut Knud Rasmussenip pingaaruteqassusia sapaatip akunnerani tullermi Sermitsiami sammineqassaaq.