Knud Kristiansenip A/S-nngortitsinissaq nalorniffigaa

Nukissiorfiit aktieselskabinngortinnissaannik siunnersuut Atassutikkut iluminni isumaqatigiinngissutigaat. Atassut sinnerlugu Inatsisartuni ilaasortaq Knud Kristiansen siunnersuummut akerliuvoq, siunnersuulli inaarutaasoq takoqqaarlugu inaarutaasumik isummerniarpoq.

Nukissiorfiit aktieselskabinngortinneqarnissaat aatsaat Inatsisartuni oqallisigineqalinngilaq, Siusinnerusukkut siunnersuut Siumup qaqilernikuuaa Atassummeersorli Knud Kristiansen taamanikkut akerliuvoq.

- Isumaga allanngornikuunngilaq. Aamma siunnersuutivittut una saqqummiunneqanngilaq taamaallaat pitsaaqutit sanngeequtillu pillugit nassuiaat saqqummiunneqassalluni. Taamaammat sunik saqqummertoqarumaarnissaa pissangallunga utaqqivara, Knud Kristiansen Sermitsiaq.AG-mut oqarpoq.

Atuisut akilissavaat
Nukissiorfiit aktieselskabinngortinneqassappata pitsaaqutit sanngeequtillu pillugit nassuiaat avatangiisinut pinngortitamullu naalakkersuisup Kim Kielsenip Siumumeersup saqqummiuttussaavaa.

Knud Kristiansenip aarleqqutigaa aktieselskabinngortitsinermi illoqarfiit mikinerit nunaqarfiillu kinguariarfiunissaat.

- Ilimagisariaqarparpummi suliffeqarfiit ingerlatsinermini sukaterillunilu aningaasarsiornerminik pitsanngorsaassasoq aktieselskabinngornerup kingorna. Nunaqarfiit illoqarfiillu mikinerit arlallit innaallagissiorfimmi nungullarsimasunik maskiinaqarput. Aserfalatsaaliinermut nutaanullu aningaasaliissutissat atuisunit aaneqarnissaat ilimanarluinnarpoq. Taamaammat suli nalorninartoqarpallaarpoq aktieselskabinngortitsineq atuisunut qanoq sunniukkumaarnersoq, Knud Kristiansen oqarpoq.

Siunnersuut Atassutip iluani oqaluusinerineqareerpoq. Politikkikkut niueqatigiinnermik tamanan kinguneqarataannaavoq.

- Takornartaanngilaq politikkikkut niueqatigiittarneq. Tamakkiisumik tapersersunngisaq tapersissagaanni illuanik aamma pissarsisoqartariaqarpoq. Assersuutigalugu uanga aalisarneq ilinniartitaanerlu pingaartilluinnarpakka. Siunnersuut 100 procentimik tapersersunngisara tapersissagukku aamma pingaartitanni taperserneqartariaqarpunga, Knud Kristiansen oqarpoq.

- Imaassinnaavoq ajortortaannai isiginiarpallaarikka landskarsimullu atajunnaarnissaata pitsaaqutai takkuitsoorlugit. Taamaakkaluartoq suli isumaqarpoq landskarsimit aningaasalersorneqartutut ingerlanermigut patajaatsumik ingerlasoq, Knud Kristiansen oqarpoq.