isornartorsiuineq
Knud Kristiansenimut apeqquterpassuit
Ineqarnermut, sanaartornermut attaveqarnermullu naalakkersuisumik isumasioqateqarneq unitsinneqarpoq, akunnerlu ataaseq qaangiuttoq nanginneqaqqippoq
Illuatungiliuttut attaveqarnermut naalakkersuisusumut Knud Kristiansenimut (A) apeqqutissarpassuaqarsimagunarput. Kiffartuussinermut isumaqatigiissutit suli atsiorneqarsimanngitsut Nuuk TV-mi saqqummiunneqarnerata kingorna Aningaasaqarnermut Ataatsimiititaliap nukingertumik isumasioqatigiinnissamut pingasunngornermi aggersarneqarpoq.
Atuaruk: Tusagassiorfik: Kiffartuussinermut isumaqatigiissutit suli atsiorneqanngillat
Isumasioqatigiinneq matoqqasumik ingerlanneqarpoq, taamaattumillu maanna oqaaseqartoqarumanngilaq. Isumasioqatigiinneq akunnerup ataatsip affaanillu sivisussuseqarpoq, tassanilu ataatsimiititaliap apeqqutitik tamaasa akissutisinissaannut piffissaq naammassimanngitsoq paasinarsivoq. Isumasioqatigiinneq akunnermi ataatsimi unitsikkallarneqareerluni aallarteqqippoq.
Knud Kristiansenip septembarip 13-ani kiffartuussinermut isumaqatigiissutit inississimanerannik nalunaaruteqareersorlu, isornartorsiuineq pivoq. Kisiannili suli atsiortoqarsimanngitsoq paasinarsivoq, taamatullu illuatungeriit suli isumaqatigiinniarlutik.
Tamannalu Inuit Ataqatigiinni politikkikkut oqaaseqartartup Aqqaluaq B. Egedep isornartorsiuineranik kinguneqarpoq.
- Tukattumik sulineq siunertaanngitsunik angusaqarfiuvoq. Inuiaqatigiit aningaasarpassuarnik aningaasaliiffigisaat ajorseriaateqarujussuarpoq, taanna ippassaq tusagassiuutinut nalunaarummi allappoq.