Politikki

Knud Kristiansen Siumumut nuuppoq

Atassummi siulittaasuusimasoq, Knud Kristiansen, ippassaq partiimik taarsiilluni Siumumut ilaasortanngorpoq.

Knud Kristiansen maanna Siumumut ilaasortanngorpoq.

Siumumi siulittaasoq Kim Kielsen tusagassiuutinut nalunaarummi taama nalunaarpoq, tassani ilisimatitsissutigaa, Knud Kristiansen Upernavimmi Siumup immikkoortortaqarfia februaarip 22-anni 2017-imi ilaasortaaffigileraa.

- Knud Kristiansen Inatsisartuni Siumup gruppianut taamaalilluni ilaasortanngorpoq. Ilutigitillugu Qaasuitsup Kommuniani qinikkatut kommunalbestyrelsemut Siumup gruppiani aamma ilaasortanngorluni, Kim Kielsen oqarpoq.

Januaarip aallartinnerani Knud Kristiansenip Atassummi siulittaasuujunnaarnini nalunaarutigaa. 2014-imili septembarimi tassani siulittaasuusimavoq.

Taamaalilluni taama aalajangernermini Inatsisartuni aamma Qaasuitsup Kommuniani attaviitsuuneranik kinguneqarpoq.

Kim Kielsenip ilaasortaq nutaaq partiimut tikilluaqquaa, suleqatigiilluarnissamullu qilanaarluni, taanna tusagassiuutinut nalunaarummi ilisimatitsivoq.

Knud Kristiansen ukiaq angallassinermi kiffartuussinermut isumaqatigiissutit suliarineri pillugit sakkortuumik akerlilersorneqarpoq. Piffissami tassani naalakkersuisuulluni isumaqatigiissutit akisussaaffigai.

Taassuma suliamik ingerlatsinera sakkortuumik isornartorsiorneqarpoq, minnerunngitsumik Siumup Kommune Kujallermi borgmesterianit Jørgen Wæver Johansenimit. Naalakkersuisut siulittaasuata Kim Kielsenip (S) aamma naammaginninnginnini paasititsissutigaa, kisiannili oqaasissaminik akunnaallisaarilluarluni.

Taassumalu partiiani aamma kiffartuussinermut isumaqatigiissutit isornartorsiorneqarput, tamannalu Atassummit tunuarneranut pissutaasut annersaata ilagaat.

Knud Kristiansen 2014-imi Atassummi siulittaasunngorpoq, Gerhardt Petersen kingoraarlugu. Taamanikkut Atassut ajornartorsioreersoq toqqagassaqarpallaanngilaq.

Taanna ingerlaannartumik politikkikkut annertuumik oqallinnermut pulatinneqariasaarpoq, tassami Aleqa Hammondip atornerluinerata nalaani qinigaagami.

Suliaq taamani Siumut Atassullu naalakkersuisoqatigiinnerannik tunuartitsisariaqarsimavoq. Taamaalilluni siulittaasunngorlaaq qinersinermut pissanganartorsiorfiusumut ingerlaannaq inissinneqarpoq.

Powered by Labrador CMS