Qaasuitsup Kommunia

Knud Kristiansen: Kommunip avinneqarnera tamanut siuariartitsissaaq

Qaasuitsup Kommunia avinneqarpat iluaqutaaginnassaaq, Atassutip siulittaasua Knud Kristiansen isumaqarpoq

Atassutip siulittaasuata Knud Kristiansenip Qaasuitsup Kommuniata avinneqarnissaa qilanaaraa

Qaasuitsup Kommuuniata marlunnik, pingasunngorluguluunniit avinneqarneratigut, inuussutissarsiornikkut, aalisarnikkut suliffinnillu ataavartunik nutaanik pilersitsinissamut ammaassisoqassaaq.

Atassutip siulittaasua, aamma ineqarnermut, sanaartornermut attaveqarnermullu naalakkersuisoq, Knud Kristiansen taama oqarpoq.

Atuaruk: Qaasuitsoq kommunerujussarmik allamik piumavoq

Unittoortitsisoq
Avannaani kommunit kattussuunneqarnerisa kingorna sumiiffippassuit, pingaartumik nunaqarfiit ineriartornerinut unittoortitsilluinnangajassimasoq, taanna isumaqarpoq.

- Kommuunit kattussuunnerini sumiiffippassuit inuussutissarsiornikkut ineriartortinnissaanut aningaasassaqanngimmat, tamanna pinngitsoortinneqangajappoq.

- Taamaattumik kommunip avinneqarneratigut, inuussutissarsiornikkut, aalisarnikkut suliffinnillu ataavartunik nutaanik pilersitsinissamut ammaassisoqassaaq, aamma aningaasarsiornerup suli sukkanerusumik eqaannerusumillu kaaviaartitsilernissaanut periarfissaq ammassaaq, Knud Kristiansen erseqqissaavoq.

Aappaagu avinneqassasoq
Avinneqarneratigut innuttaasut qanimut sullinneqarnerat, oqartussaaqataanerallu utertinneqassaaq, taanna oqarpoq.

- Atassummiit aalajangiusimavarput, Qaasuitsup Kommuunia marlunngorlugu, pingasunngorluguluunniit avinneqassasoq, ilusilersuinerlu innuttaasut peqatigalugit aallaavigalugillu suliarineqassasoq. Pingaartipparpullu aaqqissuussineq 2017-mi atuutilersinneqassasoq, Kommunalbestyrelsemut qinersineq ilutigalugu, ‘Ikaarsaariarnermi Ataatsimiititaliaq’-qarnikkut aaqqissuullugu, Atassutip siulittaasua oqarpoq.

Atuaruk: Qaasuitsup avinneqarnissaa pillugu oqaloqatigiittoqaqqissaaq

Powered by Labrador CMS