Knud K.: Nunaqarfittavut annertoorujussuarmik akiliisinneqarput

- Piffissami kingullermi Qaasuitsup Kommuunia avinneqassanersoq, kommuuni angivallaarnersoq pillugu oqallinnermi, kommunalbestyrelsemi qinigaaqativut akisussaaffeqanngilluinnartumik innuttaasunut nalornilersitsiniarsaripput.

Qaasuitsup Kommuniani kommunalbestyrelsimi ilaasortaq Knud Kristiasen Atassut tusagassiutinut nalunaarummini oqarpoq.

Qaasuitsup Kommuuniani innuttaasut atukkatik ilisimagaat oqaatigaa.

- Tamanna akisussaaffeqannginnermik taarusuppara. Tassami qinikkatut, partiitut ataasiakkaatullu apeqqummi soqutigisagut tunngaviunngillat. Tunngaviuppulli inuit atugaat pillugit taasitinneqarnissaat, kommuunillu angivallaarnera pissutaalluni aningaasatigut, ineriartornikkullu angummassinnaannginnerput, Knud Kristiansen oqarpoq.

Nunaqarfiit annertunerpaamik akiliuteqarsimasut oqaatigaa.

- Sanaartornikkut sumiiffiit tamarmik sanaartorfigineqarnerat unikaallarujussuarnikuuvoq, tamannalu kinguneqarluni; suliffissat killeqalerujussuarneri, namminersortut suliassaarunneri, ataavartumik suliffissat ikilineri, kommuunillu akileraarutitigut isaatitai annikillillutik. Inuussutissarsiornikkut unittooqqanerup kinguneraa, kommuunimut aningaasat isaasut ikilineri, inuit suliffissaarunneri, inunnik isumaginninnermi ikiorsiissutit annertuserujussuarneri, inuusuttut ilinniarusuttut praktikkerfissaarunneri, sumiiffinni atorfillit ikilisarneqarneri, Knud Kristiansen nassuiaavoq nangillunilu:

- Qanorluunniit Qaasuitsup Kommuuniata avinnissaa, ataannarnissaaluunniit illersortigigaluarutsigu, pingaarnerpaaq tassaavoq innuttaasut atugaat salliutinneqassammata. Uagullu qinikkat akisussaanerpaavugut innuttaasunut eqqortumik paasissutissiissalluta, aammalu eqqortumik innuttaasut oqariartorfigissallugit, Knud Kristiansen oqarpoq.

Qaasuitsup Kommunia avinneqassanersoq kommunimi innuttaasunit ullumi marlunngornermi tikkuussisumik taasissutigineqassaaq.

Qaasuitsup Kommuniani taasisoqarnissaa pillugu allaaserisat allat takukkit