Kalaallit Nunaannit Timersortartut Kattuffiat
KNTK qarasaasianut atortutigut ilaasortaminik nalunaarsuisalerusuttoq
Kalaallit Nunaanni Timersortartut Kattuffiani (KNTK), ilaasortat amerlassutsimikkut nalornineq pissutigalugu, ukioq manna qarasaasianut atortorissaarutitigut ilaasortanut nalunaarsuisalersimavoq.
- Naak 2016-imut pisortatigoortumik ilaasortat amerlassusaannik pisortatigoortumik takussutissaateqaraluarluta, kisitsisit eqqoqqissaanngillat. Ilaasortammi arlallit nalunaarsorneqarnikuunngillat.
Kalaallit Nunaannit Timersortartut Kattuffiani pilersaarusiornermut siunnersorti Kim Holflodi ilaasortat amerlassusaasa takussutissartaat pillugit taama oqarpoq.
Kalaallit Nunaanni Timersortartut Kattuffianinilu 14.258-iniik, Naatsorsueqqissaartarfimmit pisortatigoortumik saaqummiunneqarsimasumit amerlanerusunik ilaasortaqarlutik, Kim Holdflodip oqaatigaa.
Atuaruk: Timersortartut ikiliartorput – assammillu arsaattartut amerliartorlutik
Nalunaarsueriaaseq pitsaaneq
- Ilaasortat eqqortumik nalunaarsorneqarnissaat pillugu nalunaarsueriaatsimik pitsaanerusumik suliaqarpugut. Ilaasortammi tamarmik nalunaarsorneqarsimanngillat. Peqatigiiffinniit, kajumissutsiminik suleqataasuniit, sungiusaasuniit, aqutsisunitt taamatullu tapersersuisut kisitsisaat amingaarteqartut, taanna tikkuaavoq.
Kalaallit Nunaanni Timersortartut Kattuffia ukiaru qarasaasiatigut atortorissaarutitigut kisitsinerit aallartinneqassasut, taanna oqarpoq,
- Taamaasilluta ukiup tulliani ilaasortatta qanoq eqqortumik amerlatiginerat takuneqarsinnaalissaaq, qularinngilarali malunnaatilimmik ilaasortat qaffariaateqassasut, Kim Holflod erseqqissaavoq.
Ilaasortammi siunissami nittartakkatigut nammineerlutik nalunaaruteqarsinnaalissapput. Taamaaliornikkut ajornaannerusumik ilaasortat amerlassusaat takuneqarsinnaalernissaat, timersortartut kattuffiata naatsorsuutigaa.
Atuaruk: Aput pitsaagaangat kattuffimmi ilaasortaqarnerusartoq
Anguniagaq annertooq
Kalaallit Nunaanni Timersortartut Kattuffiata 2019-mi ilaasortat 28.000-nik amerlassuseqalereersimassasut naatsorsuuteqartoq, Kim Holflodip paasissutissiaraa. Inuiaqatigiit affangaajat aammalu ukioq kingulleq nalunaarsorneqarsimasunit marloriaatingajaat.
- Anguniagaq annertuvoq. Angunissaali qulanarpoq, kisianni tamassuma piumassuseqartippaatigut, Kalaallit Nunaannilu timersorneq kivikkusullugu, Kim Holflod oqarpoq.
Timersortartut kattuffia, Nunatta illoqarfiini amerlasuuni pikkorissaajartortarsimasoq, taanna paasissutissiivoq.
- Tamaani timersornermik aaqqissuussinikuuvugut, suliniutinillu pilersaarusiornikuulluta aamma kajummissusillit ulluinnarni peqatigiiffinni suleqataasussat amerlanerulernissaat sulissutiginikuullutigu, Kim Holflod oqarpoq.