avaleraasartuut
KNT-mik suliaq: Kielsenip nerrivik patippaa
Avaleraasartuunik nalituunik tunisassiorfimmut KNT-mut pisassiissutigineqartut pillugit maanna oqallinneq sakkortuvoq
- Naalakkersuisunut eqqunngilluinnarlunilu narrunarpoq Aqqaluaq B. Egede IA-mit Hans Enoksenilu Partii Naleqqamit tusagassiorfinnut nalunaarutigineqarmat Naalakkersuisut 40 millionit koruunit missaat kammalaatersorlutik ikioqatigiissutiginerarlugit pasilliutigalugu.
Kim Kielsenip (S) allakkatigut nalunaarummi oqariartuutaa kingulleq taama aallartippoq.
Misissuinermut innersuussisoq
Taassuma IA aamma Partii Naleraq ileqqorissaannginnerarlugit unnerluuppai.
- Naalakkersuisut arlaannaalluunniit imminnut kammalaatinulluunniit taamannak sullissinngillat, 5 koruuni 40 million koruunilluunniit pineqaraluarpata, Kielsen allappoq.
Nunatta siuttuata tusagassiorfinnut nalunaarummini arlaleriarluni nassuiarpaa, Aalisarnermut Naalakkersuisoqarfiup Deloittemi siunnersuisartut ingerlatsinermik kukkunersiuinerminni Karl-Kristian Kruse (S) pisuunnginneraraat.
Krusemut aamma Petersenimut saassussisut
Ulluni kingullerni Naalakkersuisunut isornartorsiuineq aamma sakkortuvoq. Ane Hansenip (IA) avaleraasartoortassiinermut akisussaaffik Krusep kingusissukkut Kielsenimut tunniummagu isornartorsiorpaa.
Atuaruk: IA: Krusep avaleraasartoortassat imminut sullilluni agguaappai
Kingusinnerusukkut parteeqataa Aqqaluaq B. Egede aamma Neqqap siuliattaasua Hans Enoksen Krusemut aamma Kielsenimut isornartorsiuipput.
- Naalakkersuisooqatigiit massakkorluinnaq innuttaasunut sassarlutik eqqunngitsumik pisoqartillugu tutsuiginassutsimik takutitsisariaqalerput, Naalakkersuisut siuttorisimasaat Hans Enoksen sisamanngornermi ualikkut taama oqariartuuteqarpoq.
Tusagassiorfinnut nalunaarummik nassiussisut
Pisut akornanni pingasunngornermi Naleraq aamma Inuit Ataqatigiit ataatsimut tusagassiuutinut nalunaaruteqarput qulequtalimmit 'Naalakkersuisut 40 millionit koruunit missaat kammalaatersorlutik ikioqatigiissutigigaat'.
Sermitsiaq.AG-p pingasunngornermi sisamanngornermilu Inuit Ataqatigiit attaveqarfigaat neriuutigalugu pasilliissutinut allanik uppernarsaatinik tunniussisinnaanissaat.
Maannakkumut suli akineqanngilagut.
'Illuatungiliuttut sallupput'
Naalakkersuisut siulittaasuat Enoksenip ujartuineratut unnummut sassarpoq, akillunilu Inuit Ataqatigiit aamma Partii Naleraq eqqunngitsunik pasilliinerarlugit.
- Innuttaasunut suliagut pillugit salluliorluni Naalakkersuisut uppernassusaannik toqqaannartumik innarliiniarnertut tamanna paasisariaqarpoq, Kielsenip oqaaseqaatini taama allappai, kisiannili nassuerutigaa politikeriutilluni isornartorsiorneqarnissamut aamma pasillerneqarnissamut aqqusaagaqarneq naatsorsuutigineqartariaqartoq.
- Kisianni Aqqaluaq B. Egede Hans Enoksenilu killissaa qaangerujussuarpaat. Pasilliinerit taamaattut allanit pisimagaluarukkit pinerluttaalisitsinermi inatsit naapertorlugu eqqunngitsumik pasilliisutut politiinut nalunaarutiginissaat eqqarsaatigisimassagaluarpara, ilisimasammi akerlianik eqqunngitsunik tusagassiorfinnut nalunaarummi unnerluutiginnittoqarmat.
Atuaruk: IA-p Siumumi pisortap marloqiusamik atorfeqarnera taamaateqquaat
Petersenip qitiusumik inissisimanera
Kielsenip tusagassiorfinnut nalunaarummini ataasiaannarluni Siumup allattaanera Mikael Petersen taakkartorpaa, taanna sisamanngornermi politikkikkut illuatungiminit KNT-mi pisortatut tunuarnissamik inassuteqarfigineqarpoq, suliffeqarfik taanna upernaap ingerlanerani avaleraasartoortassanik nalituunik agguaasoqarmat pinnattuuvoq.
Mikael Petersen KNT pillugu suliami pingaarutilimmik inissisimavoq, Siumumi qullersani tunisassiorfimmi suli tassani ingerlatsigami.
Atuaruk: KNT-mi pisortaq: Pasilliinerit eqqungaatsiarpaatigut
Siumup siulittaasuata partiip allattaanera aalisarnermullu naalakkersuisumut KNT-mik ullumikkut ingerlatseqatigiinnerannit, illuatungiliuttut pasilliinerannit illersorpai.
Innuttaasunut neriorsuisoq
Taamannak pasilliineq eqqunngitsuliornerunerarpaa, tassami Krusep KNT-mik piginneqataassutaa ukiup aallartinnerani erneranut tunniunneqarnikuummata.
Kim Kielsenip pineqartunut illersuinini ukuninnga naggaserpaa:
- Avaleraasartoortassat 2015-imi agguarneqarnissaat pillugu Naalakkersuisuni aalajangiivugut kammalaatersornertaqanngitsumik inunnullu ataasiakkaanut ingerlatseqatigiiffinnullu immikkut qajassuussinata.