oquk
KNRip nutsernissaa oqoqarnerata siuartippaa
Qanorooq aallakaatitsiviugallartumut nuuttussanngorpoq
KNRimi oquk ilisimagisamit siaruaatilertornerusimavoq. TV-kkut nutaarsiassaqartitsivik Qanorooq taamaattumik KNRip illorsuanit pilersaarutaasumit qaammammik ataatsimik siusinnerusukkut nuuttussanngorpoq. Tamanna Qanoruumi malunnaratarsinnaavoq.
Takuuk: Assit: Aajuna KNRmi oquk
Siorna maajip qaammataani KNRmi sulisut amerlanerit utaqqiisaasumik allaffeqarfinnut nutserput KNRip illorsua Kissarneqqortuunnguamiittoq oqoqartoq paasineqarmat. Taamaattoq Qanorooq illorsuatoqqamiit aallakaatitsisarpoq maannalu tassa paasineqarpoq init suliffigineqartut aamma oquup siaruaaffigisimagai.
Atuaruk: KNRip illutaa qimanneqassaaq
- Aallakaatitsivikorput oqoqarnerulersimasoq uuttortaanerit nutaat ajoraluartumik takutippaat. Sulisutta peqqissuunissaat akornuserusunngilarput. Taamaattumillu maanna nutsilerpugut, KNRmi nutaarsiassaqartitsinermi pisortaq Mikkel Bjarnø Lund oqarpoq.
Qangali pilersaarutaavoq Qanorooq Issortarfimmi illorsuarmut KNRip immikkoortuisa arlallit nutserfigeriigaannut aamma nuussasoq. Tamannalu maanna qaammammik ataatsimik siuartinneqarpoq. Nuunneq pissutigalugu aallakaatitsiviugallartuniit Qanorooq majip qeqqata tungaanut aallakaatinneqartassaaq.
- Aallakaatitsisarfiugallartussamiit aallakaatitsisartussaagatta toqqaannartumik aallakaatitsisinnaanngilagut. Qanorooq immiunneqareertassaaq. Aallakaatitsivimmi suli pulaartoqarsinnaasassaagut, immiuteriikkanik qiortarneqanngitsunilli ilanngutassiisassalluta. Taavalu aamma aallakaatitsiviup isikkua allaanerugallassaaq. Inuilli paasinnillutik tapersersuinissaat neriuutigaarput, nutaarsiassanimmi suli takusassapput, Mikkel Bjarnø Lund oqarpoq.