partii inuit

KNRip nittartakkami aaqqissuisoq soraarsippaa

Ingerlaannaq atuutilersumik KNRip nittartagaani aaqqissuisoq Peter Troelsen soraarsinneqarpoq

KNR Nikku Olsenimut utoqqatserluni nalunaareerpoq

Partii Inuit siulittaasuanik Nikku Olsenimik aamma Adolf Hitlerimik assersuussinneq KNRip nittartagaani aaqqissuisup Peter Troelsenip soraarsitaassutigaa. Ataasinngornermi ualikkut KNRip Peter Troelsen soraarsippaa.

Pisoq aallartippoq Partii Inuit siulittaasuat Nikku Olsen partiip ataatsimeersuarsimanera pillugu ataasinngornermi ullaap tungaa tusagassiutinut nalunaaruteqareersoq. KNRimi nittartakkami aaqqissuisoq Peter Troelsen suleqatiminut mailikkut nassiuniarluni Nikku Olsenimut nassiussisoorpoq Adolfimut assersuullugu. Nikku Olsenip qularinngilaa tamanna Adolf Hitlerimik assersuussinerusoq. Maili pineqartoq Nikku Olsenip tusagassiorfinnut partiinullu ingerlateqqippaa

- Tamanna isumakkeerneqarsinnaanngilaq. Pisimasoq tunngavigalugu Peter Troelsen soraarsipparput, KNRip pisortaa Peter Troelsen Sermitsiaq.AG-mut oqarpoq.

Peter Troelsen Nikku Olsenimut inatsisartut illorsuannut utoqqatseriartoraluarpoq. Nikku Olsenili naalakkersuisunut KNRip qullersaanut tusagassiutillu pillugit maalaaruteqartarfimmut naammagittaalliorniarpoq.

- Uagut aamma Nikku Olsen assut utoqqatserfigalugu nalunaarfigereerparput, Søren Lennert Mortensen oqarpoq.

Powered by Labrador CMS