KNRip illutaa qimanneqassaaq
KNR’imi siulersuisut isummerfigisussanngorpaat aallakaatassiornerup ilaa Nuummi illumut allamut nuunneqarsinnaanersoq
KNR’ip illutaata ilaani sulineq peqqinnissakkut illersorneqarsinnaanngilaq. Annertuumik oqoqartoq paasineqarpoq. Pisoq Naalakkersuisunut ullumi tallimanngornermi saqqummiunneqassaaq.
ISS KNR’ip illutaanik misissuereerluni nalunaarpoq illorsuup ilarujussua oqoqalersimasoq. Sermitsiap tusarfii malillugit KNRip illutaa tamarmi qimanneqartariaqassaaq.
Aallakaatitassiornerup nuunnissaa
- Sulisut arlalissuit eqqugaassapput. Maanna ulluinnarni aqutsisut, siulersuisut Namminersorlutillu Oqartussat periarfissanik misissuipput. Kisianni avaqqussinnaagunanngilarput aallakaatitassiornerup eqqorneqarnissaa. Taamaattoq maannakkuugallartoq oqaatigisinnaanngilarput sorliit qanorlu eqqugaassanersut, KNR’imi siulersuisut siulittaasuat Hans Peter Poulsen Sermitsiaq.AG-mut oqarpoq.
KNR’imi siulersuisut pisoq pillugu ualimut ataatsimiittussanngorput.
- Ilaatigut misissussavarput aallakaatitassiorneq sumut nuunneqarsinnaanersoq, Hans Peter Poulsen oqarpoq.
Kultureqarnermut Naalakkersuisut Nick Nielsen Siumumeersoq ullaap tungaa pisoq pillugu aamma ilisimatinneqassaaq.