KNR
KNRip illorsua isatissaaq
KNRip illorsuarisimasani Kissarneqqortuunnguamiittoq qimallugu maanna Issortarfimmut nuussimalerpoq
KNRimi aallakaatitsivimmi aqutsisoq Tue Jensen kingullermeerutaasumik aallakaatitsinermut atortorissaarutinik tallimanngormat Kissarneqqortuunnguami qamitsivoq. Illorsuatoqaq taanna annertuumik oquttoq annaanneqarsinnaajunnaarpoq taamalu isaterneqartussanngorluni.
KNR maanna Issortarfimmumi angerlarsimaffeqalerpoq Nukissiorfiit qitiusumik allaffeqarfiata ungasinngisaani. KNR siornatigut H. J. Rinksvejimi radiohusitoqqamiikkaluarpoq. Radiohusitoqarli aamma oqoqarmat KNR radiomi sulisut Kissarneqqortuunnguami Grønlandsflyp hangaritoqaanut KNR-TV-ip taamanikkut atulereersimasaanut nuupput.
Taannali aamma ukiut arlallit oqoqarpoq siornalu maajip qaammataani ajornartorsiut ima annertutigilerpoq KNRip immikkoortoqarfii Issortarfimmi illorsuarmut nuuttariaqarsimallutik. Maannalu nutserneq tamarmi naammassivoq.
- Issortarfik 9-mut sapaatip akunnerani uani studia kingulleq nuunneqasaaq, ininut nutaanut. Nutsernerup kingunerisaanik TV-kut ullaap tungaani aallakaatitsisarnerit sivikitsumik uninngagallassapput. Qanorooq aallakaatitsiffiugallartumiit aallakaatinneqartassaaq. Pisarnerminit Qanorooq sivikinnerussaaq ajoraluartumillu immiuteriigaassalluni, KNR-mi pisortaq Søren Lennert Mortensen ilisimatitsivoq neriuutigalugulu nutsernerup nalaani isiginnaartartut naalaartartullu naammagittaqataajumaartut.