KNR kukkuluttoreersoq
KNRimi attaveqatigiissimaneq Nikkup takujumavaa
KNR pillugu suliami Partii Inuit siulittaasuata Nikku Olsenip qallunaaq eqqartuussissuserisoq ikiorsiuppaa
KNRip aamma Partii Inuit siulittaasuata Nikku Olsenip akornanni aaqqiagiinnginneq suli ingerlavoq. Nikku Olsenip maanna qallunaaq eqqartuussissuserisoq ikiorsiullugu KNRip iluani attaveqatigiissimanerup tunniunneqarnissaa piumasaraa. Tamannali KNRip peqataaffigiumanngilaa.
Suliaq aallartippoq KNRip nittartagaani aaqqissuisuusimasoq Peter Troelsen kukkunikkut Nikku Olsenimut mailimik nassitsilluni Adolfimut sanilliussimmat. Nikku Olsenip qularinngilaa Adolf Hitlerimut assersuunneqarluni. Maili pineqartoq Nikku Olsenip tusagassiorfinnut partiinullu ingerlateqqippaa.
Ammip qalipaataanik immikkoortitserpalaarneq
KNRip pisortaa Søren Lennert Mortensen isumaqarpoq Nunatsinni demokrati tatiniarneqalersoq. Taama nalunaarpoq Nikku Olsen piumasaqarmat KNRip ilumi attaveqatigiissimanera takujumallugu.
- Suliffeqarfiup iluani sulinermut atatillugu attaveqaqatigiittarmut paasissutissanik tunniusseqqusisoqarnera KNR-ip sutigulluunniit akuerinianngilaa, taamaaliornissamut inatsisitigut tunngavissaqaranilu ingasappallaaqimmat. Aammattaaq taamatut piumasaqaateqartoqarneranut itigartitsinitsinnut tusarfiit illersorneqarnissaat pissutaaqataavoq, KNRip pisortaa Søren Lennert Mortensen tusagassiutinut nalunaarummini allappoq.
KNR Nikku Olsenimut utoqqatsissuteqareerpoq. Taamattoq emailikkut KNRip Nikku Olsenillu akornanni attaveqatigiittarneq ingerlaannarpoq KNRillu naliliinera malillugu nipi tusarniitsoq atorlugu ingerlasoqarpoq.
- Oqaatigissavara Nikku Olsenip e-mailikkut uannut allakkamini ima oqarnera eqqortuunngimmat, issuaavunga: ".... Tusagassiortussi danskit qanoq nakkarsaatigisarnersut uppernarsarneqarpoq!” Partiip siulittaasuata taama oqaaseqarnera akuerineqarsinnaanngilluinnarpoq ammillu qalipaataanik immikkoortitsinermut attuumassuteqarluni Kalaallit Nunaannilu asissuinngitsumik tamat oqartussaaqataanerat tunngavigalugu oqallinnermut tulluartuunani, Søren Lennert Mortensen nalunaarpoq.
Taassuma ilanngullugu oqaatigaa KNRip tusagassiortuisa sulinerat tutsuiginartutut nalilerlugu. Isumaqarnerarporlu pisimasoq manna ajusaanartoq Nikku Olsenip politikkikkut siunertaminut atorniarsarigaa.