Radio
KNR toqqaannarnerusumik aallakaatitsisalerniarpoq
Tusagassiorfik innuttaasunik kiffartuussisoq, aallakaatitsinermi 2017-imi allannguiniarluni kalerriutiginnippoq
KNR Radio maanna allorialerpoq, tusagassiorfiullu innuttaasunik kiffartuussisup tamanna 'tusarnaartartunut tusarnaartorilerumaagassanullu aallakaatitseriaaseq nutaaliaanerusoq, eqaannerusoq minnerunngitsumillu ullutsinnut naleqquttoq qulakkeerniarlugu' nassuiarpaa.
Atuaruk: KNR amerlanerusut iluaraat
Radio toqqaannartoq
KNR Radiop toqqaannartumik aallakaatitsinerusalernissani siunniuppaa, ullutsinni pisunik aallakaatitsineq qulakkeerniarlugu, taamatullu aamma nunatsinni tamanit imaqartassallutik.
- Radioliornermi pitsaassutsip periarfissallu atorluarnissaat tassani pineqarpoq. Pisut pinerani nukiit pigisagut atorluarlugit aallakaatitsisassaagut, KNR Radiomi pisortaq Masaana Egede, tusagassiuutinut nalunaarummi oqarpoq.
Ulluunerani toqqaannartumik aallakaatitsinerit nutaat, ullutsinnut naleqquttut inuppalaartumik saqqummiunneqartut, ukiumit nutaamit tusarnaarneqarsinnaalissapput. Ukiarli manna toqqaannartumik aallakaatitsinerit amerlaneruleriissapput.
Atuaruk: KNR-imi tusagassiortoq uranimut isorinnittoq soraarsikkaat
Tusarnaartartut kissaataat
KNR Radiop aallakaatittagaasa allanngortinnissaat 2015-imi isiginnaartartunik tusarnaartartunillu misissuineq tunngavigalugu ilaatigut suliarineqarput.
Misissuinerup takutippaa aallakaatitassiat maannaqqissaaq pisunit imaqartut kulturimullu tunngasut tusarnaartartunit kissaatigineqartut.