aallakaatitsisarnerit

KNR thailandermiusut

Inuiaqatigiinni ikinnerussuteqartut aamma sullinniarlugit allaanerusunik KNR-imi aallakaatitsisoqartalersinnaavoq

Issittumi pissutsinik aallakaatitsisartut ilaannikkut, Thailandimiut inuusuttunut aallakaatitassiaat YaSalution

'Yindī t̂xnrạb!' imaluunniit tikilluarit, Qanoruumi atuaasoq taama aallarniivoq.

Tamanna siunissami piviusunngoratarsinnaavoq.

Narsami, Nuummi Nanortalimmiluunniit pisut thailandermiusut savalimmiormiusulluunniit aamma aallakaatinneqartalersinnaapput. Tamannali maannakkut eqqarsaataannaagallarpoq. KNR-ip pisortaa Søren Lennert Mortensen Sermitsiaq.AG-mut oqarpoq.

Ikinnerussuteqartut sullinneqartussaasut
KNR Namminersorlutik Oqartussanik sullissinissamut isumaqatigiissuteqarfeqarpoq. Kulturikkut pisut, inooriaatsimullu tunngasut saqqummiunneqartassasut isumaqatigiissummi ilaatigut allaqqasoqarpoq.

Kalaallit oqaasii aamma attanneqarnissaat inerisarneqarnissaallu isumaqatigiissummi ilaavoq. Inuiaqatigiinni ikinnerussuteqartut kalaallisullu oqaaseqanngitsut aamma KNR-ip sullittussaavai.

KNR-ip pisortaanik apersuineq Randi Brobergip Partii Inuimeersup KNR-imik assigiinngitsunik isornartorsiuineranit aallaaveqarpoq. Nunanit allaneersunit amerlavallaanik KNR-imi takutitsisoqartartoq ilaatigut isornartorsiuisoqarpoq, kiisalu tusagasseeriaaseq aamma eqqunngitsuusoq isornartorsiuisoqarluni.

Isornartorsiuinerit annertuut
Isornartorsiuisoqarnera KNR-imi pisortamit paasiuminaatsinneqarpoq. Inuiaqatigiit soqutigisaat aallakaatinneqartartut oqaatigaa.

- Tamannami anguniartuaannarparput. Inuiaqatigiit takujumasaat aallakaatitassiornissatsinni pilersaarusiortuaannarparput. Kikkulli tamarmik tamakkiisumik nuannaartissinnaanngilagut. Inuimmi qujanartumik soqutigisaat assigiinngitsuupput. Kikkummi tamarmik isiginnaarusutanik nuusseqattaarnissamut periarfissaqartinneqarput, Søren Lennert Mortensen oqarpoq. Atuisut isumasiorneqarumaartut aamma oqaatigaa.

Innuttaasut KNR-ip aallakaatittagaanik iluarisimaarinnittut isumasiuinerup kingulliup takutippaa. Kalaallisuunik aallakaatitsisarneq januarimi 2013-imi aamma annertunerulerpoq.

Aallakaatitassiat kalaallisuut amerlanerulernissaat pisortap qularaa.

- Maannakkut aallaavigineqartoq atorneqaannassaaq. Inuiaqatigiinni ikinnerussuteqartut aamma peqataatinneqartussaapput, soorlu danskisuinnaq oqaasillit. Thailandermiusut savalimmiormiusullu aallakaatitsisalernissarput eqqarsaatigaarput, kikkummi tamaasa sullippavut. Namminersorlutik Oqartussanit tapiiffigineqaqqinnissarput naatsorsuutiginngilarput, aningaasammi sumit aaneqassagamik tapiisoqaqqissappat? Arlaannik aalajangersimasumik aallakaatitsinerput annertunerulersissavarput imaluunniit arlaannik aallakaatitsisarnerput annikinnerulersissavarput, Søren Lennert Mortensen oqarpoq.

KNR-imi aallakaatitsisarnerit Partii Inuinit kisimi isorineqanngilaq. Sulisorineqartulli aamma isornartorsiorneqarlutik.

Partii Inuit KNR-imik isornartorsiuinera aviisimi Sermitsiami ullumi tallimanngornermi saqqummersumi atuarneqarsinnaavoq, isornartorsiutillu KNR-imit aamma isumaqatigineqannginneri atuarneqarsinnaalluni.

Aviisi ataani pisiarineqarsinnaavoq:

Powered by Labrador CMS