KNR-mit nutserneq aallartingajalerpoq
KNR-mi oqummit init eqqorneqarnerit sapaatip akunnera tulleq matuneqassapput. Oquk sulisut peqqissusaannik ulorianartorsiortitsivoq
KNRimi siulersuisut ullumi ataatsimiinnerminni aalajangerput kingusinnerpaamik sapaatip akunnera tulleq ininik aallakaatitassiorfiusinnaasunik nassaassallutik. Kulturimut Naalakkersuisup Nick Nielsenip Siumumeersup akisussaassuseqartumik aaqqiisoqarnissaa pingaartippaa.
KNR annertuumik oqoqarpoq. Nuummi Kissarneqqortuunnguami illu ima oqoqartigaaq sulisut peqqissusaat ulorianartorsiortinneqarluni.
KNR akissaqanngilaq
- Siulersuisut ullumi ataatsimiinnerminni aalajangerput piaartumik aaqqiiniartoqarnissaa pisariaqartoq, taamaammallu Naalakkersuisoqarfik suleqatigilluinnarlugu piaartumik suliniartoqalernera siulersuisut nuannaarutigaat, naatsorsuutigaallu sapaatip akunnerata tulliata ingerlanerani init allat pisariaqartinneqartut nassaarineqareersimassasut nutserfigineqarlutillu, KNR-imi siulersuisut siulittaasuat Hans Peter Poulsen siulersuisut ullumi ataatsimiikkasuareertut nalunaarpoq.
Ininik nutserfiusinnaasunik ujarlerneq aallartereerpoq. Kulturimut Naalakkersuisoq Nick Nielsen KNR-mit aamma ataatsimeeqatigineqareerpoq.
- Pingaaruteqarluinnarpoq akisussaassuseqartumik aaqqiisoqarnissaa. Aaqqiissutaasinnaasut KNR-mi aqutsisut aamma siulersuisut suliaralugit aallartereerput, Nick Nielsen Sermitsiaq.AG-mut oqarpoq.
Ininut allanut nutsernissaq akisussaaq, aningaasartuutilli tamaasa KNR-ip kisimiilluni akilersinnaanngilai.
- Taamatut ajornartorsiuteqarnerup kingorna naatsorsuutigaarput aningaasartuutaasussat tamaasa Naalakkersuisunit isumagineqarnissaat qulakkeerneqassasoq, maannakummi KNR-ip aningaasaqarnera aallaavigalugu nutsernissamut aningaasartuutissat akissaqartinneqangimmata, Hans Peter Poulsen oqarpoq.