KNR-ip sulisuminit radioqarfik pisiaraa

KNR-ip radio nukittorsarniarpaa. Ima nukittorsarniartigivaa allaat innuttaasunik kiffartuussisup Nuup illoqarfiani radio allaakaatitsisartoq inuusuttut naalaartartut suli amerlanerusut tiguarniarlugit pisiarisimallugu.

Nuummi radio aallakaatitsisartoq pineqartoq tassaavoq ‘Voice of Greenland’, taanna KNR-imi Pilerisaarivimmi atorfilimmit Claus Nissenimit KNR-imit pisiarineqarpoq.

Taama knr.gl allappoq.

Inuusuttunut attaveqarusupput
Claus Nissenip juuli 2013-imi radio Nuummi aallakaatitsisartoq ‘Voice of Greenland’ ammarpaa Nuup illoqarfia qaammatini marlunni lokalradioqanngereersorlu.

‘Voice of Greenland’ nipilersuutinik salliussilluni aallakaatitsisartuuvoq.

- KNR-imi inuusuttunik naalaartartunik, uanga misigisakka naapertorlugit piffissami sivisuumi ilaginnarsimasatsinnik, qanimut attaveqarnerorusuppugut, taama innuttaasunik kiffartuussiviup pisortaa Søren Lennert Mortensen radiop immikkut aallakaatitsisartussap atulerneranut atatillugu tusagassiuutinut nalunaaruteqarluni allappoq.

Atuaruk: Nuuk illoqarfimmi radiortaarpoq

Namminneq kanalimik aallartitsisinnaasimagaluarput
Søren Lennert Mortensenip knr.gl-imut nassuiaatigaa innuttaasunik kiffartuussiviup nammineerluni kanali aallartiinnarsimasinnaangaluaraa.

- Nalilerparput sukkanerullunilu akikinnerussasoq taamaaliorutta. Aamma taava ulloq siullermit aallakaatitassianik nipilersukkanillu aallakaatitsisinnaavugut. Tassa taamaaliorniarluta aalajangersimavugut, Søren Lennert Mortensen knr.gl-imut oqarpoq.

Suli maannamut ilisimaneqanngilaq KNR-ip ‘Voice of Greenland’ Claus Nissenimit pisiarigamiuk qanoq akilersimaneraa.

KNR-imit ilisimatitsissutigineqarpoq ‘Voice of Greenland’ siullermik web-itut radiokanaliussasoq, FM kanalimik Nuummi ilaqartinneqarluni. Kisiannili FM-ikkut aallakaatitsisarneq sinerissap sinneranut siaruarternissaa KNR-imit sulissutigineqarpoq aamma oqaatigineqarluni.