Politik tusagassiuutillu
KNR-ip radioqarfimmik pisisimanera pillugu IA paasisaqarusuppoq
KNR-ip 'Voice of Greenland'-imik pisisimanera pillugu Inuit Ataqatigiinnit Mimi Karlsen paasissutissanik paasaqarusuppoq
Naak KNR-imi pisortap Søren Lennert Mortensenip KNR-ip radioqarfimmik pisisimanera isornartorsiuineq eqqissisimasumik tigugaluaraa, pisineq Atuagagdliutinit annertuumik sammineqarpoq. Taamaattumik KNR tatisimaneqarpoq.
Innuttaasunik sullissinissamut pisussaaffilikkap pilerisaarut nittartakkaminit knr.gl-imit Ilinniartitaanermut, Ilisimatusarnermut, Ilageeqarnermullu Naalakkersuisumit Nivi Olsenimit Demokraatimeersumit piumaffigineqareerluni peerpaa, pisorlu KNR-imit pisortamit utoqqatsissutigineqarpoq. Tamanna pivoq nittartagaq aqqutigalugu KNR piseqqusaarutinik assigisaannillu nittarsaassinissaminut inatsisitigut periarfissaqanngitsoq nalileereersorlu.
Nuummi radio aallakaatitsisartoq ‘Voice of Greenland’ KNR-imi Pilerisaarivimmi atorfilimmit Claus Nissenimit pigineqartoq KNR-imit pisiarineqarnera ullut arlaqanngitsut qaangiunneranni nalunaarutigineqarpoq. Radioqarfiup pisiarineqareernerani Claus Nissen Pilerisaarivimmi pisortatut atorfinitsinneqarpoq.
KNR-ip radioqarfimmik pisisimanera pillugu Inatsisartuni ilaasortaq Inuit Ataqatigiinnit Mimi Karlsen akissutinik piumasaqarpoq.
Apeqqutit isornartut
Taamaattumik Mimi Karlsen KNR-ip 'Voice of Greenland'-imik pisisimanera pillugu paragraf 37 naapertorlugu apeqquteqarpoq. Apeqqutigaa 'Nuna tamakkerlugu radiokkut TV-kkullu ingerlatsiviup kiffartuussiffiusussap pisortanit tamakkiisumik aningaasalersorneqarnera eqqarsaatigalugu sumiiffinni radioqarfinnik ikilisaaqataanissaanut Naalakkersuisut isumaqataappat?'
Aamma 'KNR radiokanalimik pisinermigut aallakaatitsinissamut akuersissummik qulakkeerinneqaqqaarani ingerlatsisimanerpa, tamannalu KNR-imut qanoq kinguneqassava?'.
Inuit Ataqatigiit tunuliaqutaralugit Inatsisartuni ilaasortap apeqqutai qulingiluaasuni aamma apeqqutigaa 'Radiokkut TV-kkullu innuttaasunik kiffartuussinissap tamakkiisumik pisortanit aningaasalersorneqarnera eqqarsaatigalugu ussassaarutitigut isertitaqarnissaq Naalakkersuisut isumaat naapertorlugu qanoq naapertuutsigiva?'
KNR pillugu AG-mi aallaaserineqartut allat aviisimi atuarneqarsinnaapput. Aviisi ataani pisiarineqarsinnaavoq: