KNR-ip ilumini oqalliseriaasia Naalakkersuisut tupaallaatigaat

Naalakkersuisut KNR-ip siulersuisuisa siulittaasuanik ataatsimeeqateqarput, KNR-ip nittartakkamini aaqqissuisuminik soraarsitsinera pillugu, aammalu KNR-ip pingaarnertut aaqqissuisoqarfimmini tunngavigisai pissusilersoriaasiilu pillugit.

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen, februarip ulluisa pingajuanni KNR-ip siulersuisuisa siulittaasua Hans Peter Poulsen ataatsimeeqatigaa, tassani KNR-ip nammineq ilumini attaveqaqatigiinnermi periaaserisai, tamatumalu nutaarsiassalerinermut aaqqissuisoqarfimmi sunniutigisinnaasai ataatsimiinnermi eqqartorlugit.

Ataatsimiinneq ingerlanneqarpoq KNR-ip nittartagaani aaqqissuisuata maanna soraarsitaareersup Peter Troelsenip Nikku Olsen Adolf Hitlerimut assersuutigereeraalu. Peter Troelsenip suleqatiminut mailimik nassiussiniarluni tusagassiorfinnut partiinullu allakkani kukkunikkut nassiuttoorpaa.

Akuersaarneqarsinnaanngilaq
Ataatsimiinnermi Nick Nielsen-ip piumasaraa siulersuisut akisussaaffigissagaat Naalakkersuisunut tuaviortumik nalunaarusiortoqarnissaa, tassanilu nalilersorneqassasut KNR-ip nammineq ilumini attaveqaqatigiinnermi periaaserisai, tamatumalu nutaarsiassalerinermut aaqqissuisoqarfimmi sunniutigisinnaasai.

- Pisariaqarluinnarpoq uagut inuiattut tatigisinnaassagipput nunatta nammineq tusagassiorfiutaata KNR-ip naapertuilluartumik aammalu susassaqartunut tamanut aamma partiinut assigiimmik periaaseqarnissaa. Tusagassiortut isorinnittumik pissusilimmik tusagassiorsinnaaneranni tunngaviusoq pisariaqarluinnartoq tassaavoq tusagassiortut ataasiakkaat imaluunniit aaqqissuisut tusagassiornermi ileqqorissaarnissamut malitassanik tunngavilimmik ingerlatsisarnissaat, taamalu namminerisamik isummat aammalu naalakkersuinikkut namminerisamik isummat nutaarsiassalerinermi assilissamik eqqunngitsumik takutitsiffiusannginnissaat. Taamaattumik uanga KNR-ip siulersuisui pisussaaffilersimavakka tuaviortumik nassuiaasiornissaannut, nittartakkami aaqqissuisumut tunngasoq tusagassiortutut tamatigoortuusinnaassutsimik eqqortitsisinnaannginnermi kisermaajunersoq pillugu, imaluunniit pissusilersorneq akuerineqarsinnaanngitsumik KNR-imi tusagassiorfittut ingerlatsinermik tunngaveqarnersoq pillugu, Nick Nielsen oqarpoq.

Tusagassiorfiit naqisimaneqanngitsumik tusagassiorsinnaasut oqarpoq.

- Qularutigineqassanngilarlu uanga Naalakkersuisutut siusinnersukkut arlaleriarujussuarlunga oqaatigisariikkattut illersoriga arlaannaannulluunniit atanngitsumik, aammasumik isorinnittumillu tusagassiornermik ingerlatsisoqartuarnissaa, aammali qularutigineqassanngilaq isorinnittumik pissusilimmik tusagassioriaaseq ileqqorissaarnissami annertuunik piumasaqaateqarfiummat, taamalu malersuineq kanngunarsaanerlu innuttaasut, politikkerit, kattuffiit, suliffeqarfiit partiillu akuerineqarsinnaanngilluinnaraat, Nick Nielsen oqarpoq.

Nikku Olsen Sermitsiaq.AG-mit apersorneqarnermini oqarpoq, pisoqareernera kingorna tusagassiorfiit ammasumik oqallisigineqarnissaat pisariaqartoq.