KNR-imi pisortaq: Tamatta pissutsinut malinnaasariaqarpugut

- KNR immikkut pisussaaffeqarluni innuttaasunik kiffartuussiviuvoq ilaatigut nutaarsiassanik,
pisut pillugit aallakaatitassianik, oqallitsitsinernik aliikkutassianillu aallakaatitassianik Kalaallit
Nunaat tamakkerlugu innuttaasut tamarmik pissarsisinnaanissaannik qulakkeerinissaminut
akisussaaffeqartoq. Inuiaqatigiinni tamat oqartussaaqataaffigisaanni tamani tamanna pingaaruteqarluinnarpoq kikkullu inuiaqatigiinni oqallinnermut peqataasinnaanissaat - tassalu
nutaarsiassanut akissaqartunut nutaarsiassanullu akissaqanngitsunut - killilersorneqanngisaannassaaq.

KNR-imi pisortaq Søren Lennert Mortensen oqarpoq, taamaasilluni nittartakkatigut nutaarsiassat siunissami akilerneqartalissanngitsut naqissuserlugu.

Tusagassiiivik Sermitsiaq.AG-p 2013-mi angusarisimasani naammaginanngitut saqqummiuppai. Akileraarutit ilanngaatigereerlugit 3.300.000 koruuninik Sermitsiaq.AG sinneqartoorpoq, taamaammallu nittartakkatigut nutaarsiassat akileqqaarlugit takuneqartalernissaat siunersuutigalugu.

Periarfissat ammasut
- Torersuunissaa pinerullugu - erseqqissaatigissavara uagut sullitavut KNR-ip tunniuttagaanut
akiliuteqartareermata. KNR aningaasanut inatsimmit ukiumoortumik toqqaannartumik aningaasaliiffigineqartarpoq, inuiaqatigiit aningaasaataannit, tassalu tamatta akileraarutitigut
akilikkatsinnit. Uanga illillu akiliutitsinnit, KNR-ip pisortaa oqarpoq.

- Tusagassiuuteqarfik KNR nutaanik eqqarsarnikkut periarfissanullu nutaanut naleqqussarnikkut ukiuni aggersuni allanngortiterisussaavoq, aamma digitalitigut periarfissat allanngoriartornerat sullitallu atueriaasiisa allanngoriartorneri ilutigalugit allannguutit ingerlaannarnissaat qularutiginngilara.

Tassunga Poul Krarup ima oqarpoq:

- Kalaallit Nunaanni tusagasseeriaasiup ineriartorneranut Tusagassiivmmi Sermitsiaq.AG-mi naleqqussartuarpugut, ukiunilu arlaqartuni taamaaliorpugut. Taamaattumillu maannakkut sutigut tamatigut peqataasinnaalluarluta. Aviisit ataatsimoortilernikuuagut, nittartakkatsinnilu ingerlalluarluta. Atortunik nutaanik ineriartorpugut. Ineriartorneq maannakkut ima isikkoqarpoq inuit nittartakkatigut atuartarnerat qaffakkiartornerani aviisisisartut ikiliartormata. Taamaakkaluartoq E-aviisinik tunisaqartarnerput qaffakkiartorpoq. Ussassaarutilli pisariaqarteqaagut, taakkumi napatippaatigut. Ineriartornitsinni ujartuisariaqarpugut qanoq nittartakkatsinni aviisinitulli isertitsisinnaanerluta. Tusagassiinikkut assitalersuinikkullu suliaqartut akissaqartinneqartariaqarpummi. Maannakkut imaappoq nittartakkatsigut annikitsuinnarmik isertitsisoqartarmat taakkulu ussassaarutininngaanneertarput. Nittartakkatigut akeqanngitsumik nutaarsiassarsiinerit tusagassiortunut assitalersuisunullu naleqanngitsutut isiginninnerussapput.

Misissuinerit akeqarput
- Nutaarsiassat assigiinngequteqarput. Nutaarsiassaqarpoq tusagassiutinut nalunaarutit sukkasuumik suliarineqarsinnaasut. Taakkuninnga paasissutissiinerit soorunami akeqassanngillat. Akeqanngitsuuppummi. Nutaarsiassalli annertuumik misissuinertallit, ilaatigut attaveqaatinik akisuunik aammalu angalanernik akisuunik ingerlanneqartariaqartarput. Taamatullu sulineq aamma nittartakkatigut sulinermut siunissami nuutsinneqaleriartortussaapput.

- Tusagassiiviuvugulli akileraartartut akiligaat KNR unammillerteralugu. KNR-imut annertuumik akileraarutitigut aningaasalerneqartaraluartoq tusagassiineq kisimi ingerlassinnaanngilaat. Taamaattumik pitsaanerusumik tusagassiisoqartalissappat aningaasanik amerlanerusunik atorfissaqartitsisoqarpoq, Poul Krarup oqarpoq.

Unammilligassat amerlasuut
Søren Lennert Mortensenip eqqumiiginartippaa sooq Sermitsiaq.AG-p nittartagaa akileqqaarlugu nutaarsiassat takuneqarsinnaalissappata sooq aamma KNR.gl assinganik iliuuseqassanersoq.

- Kalaallit Nunaanni innuttaasut taamaalillutik nunatsinnit nunanillu allanit nutaarsiassat aqqutissat assigiinngitsut pigineqartut tamaasa aqqutigalugit pissarsiarinissaannut akiliuteqartarput. KNR nunarsuarmilu tugasassiuuteqarfiit allat ukiuni makkunani digitalitigut nutaanik periarfissaqalerneratigut allannguutinik unammilligassanillu annertuunik aqqusaagaqarput minnerunngitsumillu sullitat ulluinnarni ulapaarfiusumi aallakaatitassianik isiginnaarnissaminnut naalaarnissaminnullu periarfissanik eqaannerusunik piumasaqaateqarlutik - matuma
nutaarsiassat soorunami aamma ilaapput.

Akileraarutit ilanngaatigereerlugit 3.300.000 koruuninik Sermitsiaq.AG sinneqartoorpoq, ukiup siuliani naammagisimaarneqartunik 4.741.000 koruuninik sinneqartoortoqartoq, nalunaarutigineqareerpoq.

Sermitsiaq.AG Namminersorlutik Oqartussanit ukioq kingulleq 1,5 million koruuninik taperneqarpoq, ukiup siuliani tapiissut 2,5 million koruuniulluni. Ussassaarutit nunatsinni ussassaarutigineqartaraluartut danskit tusagassiorfiinut nuutsinneqarmata naalakkersuisut siuliinit aallartinneqarpoq.

Namminersorlutik Oqartussat isornartorsiorneqarpoq
- Tamanna kinguneranik aviisit ataatsimuulersinneqartariaqarsimapput kiisalu sulisunik soraarsitsisoqarluni aammalu aviisit aaqqissuunneqarnerat allanngortinneqartariaqarluni. Nammineerluta aamma suliffissanik ussassaariffimmik aallartitsinikuuvugut, akigititagulli nalimmassartariaqarsimavagut. Akit qanoq inissisimassanersut atorfilittat atorfiliillu suliffiini sulisut aqutaraat. Akit qaffakkiartuinnavipput. Atofillit uagut suliagut pisiarisartussaavaat, maannakkumulli akigitinneqartut akuersaanngilagut. Danskit nittartagaanni suliffissanik ussassaarisartunut unammillerneqarpugut, akit assigiisinneqanngillat sulinerpullu assigiinngeqalutik, Poul Krarup oqarpoq.

Nangipporlu:

- Nunatsinni suli aviisinik marlunnik saqqummersartoqarpoq, sumiiffinni assigiinngitsuni pingasuni aamma saqqummertoqartarpoq, nutaarsiassaqartitsiviugut pingaaruteqarluinnartut kiisalu aamma qaammammut saqqummersartunik suliaqartarluta. Aamma tuluttut saqqummertalernissarput pilersaarutigaarput sulissutigalugulu Issittumi pissanganartumik ingerlasoqarnera pissutigalugu. Sermitsiaq.AG-mi sulisut angusaqarsimaqaat sulilluarsimanerallu tamanna tunngaveqarluni, Poul Krarup oqarpoq.