KNR nukittorsarpoq
KNR akuersissuteqarani aallakaatitsivoq
KNR radioqarfiup Nuummi kisimi aallakaatitsisartup pisiarinerani aallakaatitsisinnaanermut akuersissummik piniarsimanngilaq, taama Nuuk TV paasissutissiivoq
KNR Nuummi aallakaatitsisartumik radioaqarfimmik, Voice of Greenlandimik, pisinermini aallakaatitsinissamut akuersissummik piniarsimanngilaq.
Taama Nuuk TV pingasunngornermi unnukkut paasissutissiivoq.
Nittartakkami uani marlunngornermi oqaluttuarineqartutut KNR-ip innuttaasunik kiffartuussisussaatitaanermini radio nukittorsarniarpaa. Allaat ima nukittorsarniartigivaa KNR-imi Pilerisaarivimmi atorfilimmit, Claus Nissenimit, radioqarfik Nuummi aallakaatitsisartoq ‘Voice of Greenland’ pisiarisimallugu.
KNR-illu paasissutissiinera najoqqutaralugu Voice of Greenland, nipilersuutinik salliussilluni aallakaatitsisartoq, Nuummi aallakaatitsivoq, kisianni aamma Voice of Greenlandip nittartagaatigut nunatta sinnerani tusaaneqarsinnaalluni.
Atuaruk: KNR-ip sulisuminit radioqarfik pisiaraa
Namminersorlutik Oqartussat tupigusuttut
Nuuk TV-ip paasissutissiinera najoqqutaralugu, Namminersorlutik Oqartussat ukiumut 70 million koruunit pallillugit KNR-imut tapiissuteqartartut, KNR-ip Voice of Greenlandimik pisiaqarnera tupaallaatigaat, KNR-imillu apeqquteqarsimallutik suna pisiarisimaneraat.
- Computeri imaluunniit nerrivik allaffik pisiarineqarpa? Aallakaatitsinermummi akuersissutaasinnaanngilaq, Namminersorlutik Oqartussat KNR-imut apeqqutigisaat Nuuk TV-i najoqqutaralugu taakkuusimapput.
Nuuk TV-immi paasissutissat pissarsiarisimasai najoqqutaralugit aallakaatitsisinnaanermut akuersissut piginnittumut nutaamut tunniunneqarsinnaanngilaq.
- Namminersorlutik Oqartussat nassuerutigaat KNR aallakaatitsinissamut akuersissumik, radioqarfimmut Nuummi kisimi aallakaatitsisumut, qinnuteqarsimanngilaq, Nuuk TV taama paasissutissiivoq.
Sermitsiaq.AG-ip KNR-ip pisortaanera Søren Lennert Mortensen apersorusussimagaluarpaa, kisiannili taassuma tusagassiuutinut nalunaarut ullup ingerlanerani nassiunneqartussaq innersuussutigaa.
Sermitsiaq.AG Namminersorlutik Oqartussanit sisamanngornerup ullaap tungaani oqaaseqartitsiniaraluarami ataatsimiittoqarnera pissutigalugu iluatsitsinngilaq.
Atuaruk: KNR-imi attaveqaqatigiinnermut pisortanngorlaaq suliffimmini qaffatsinneqartoq