Avannaata Qimussersua

KNQK: Sukkaniunnissap nuunnissaa pinngitsoorsinnaasimagaluarpoq

Qimussertartut peqatigiiffikuata uninneranit suli eqqissisoqarsimannginnerata kinguneranik Avannaata Qimussersua eqqorneqartoq, qimussertartut kattuffiat KNQK nalunaarpoq

Avannaata Qimussersua Qasigiannguani pisimasinnaagaluarpoq peqatigiiffik immikkut ittumik ataatsimeersuarnermigut tamakkiisumik siulersuisoqaleqqissimasuuppat, KNQK nalunaarpoq

Avannaata Qimussersuaqarnissaata Qasigiannguaniit Ilulissanut nuunneqarnera pinngitsoorneqarsimasinnaagaluartoq qimussertartut kattuffiat KNQK nalunaarpoq. Qasigiannguani aaqqissuisut suliarujussuaq naammassereerlugu nalunaarsimapput sukkaniutsitsinissarsua akisussaaffigisinnaanagu.

Atuaruk: Pissaaneqarniunnermi Avannaata Qimussersua nuunneqarpoq

Avannaata Qimussersua 2012-mi Qasigiannguani ingerlanneqarpoq qimussertartut peqatigiiffiat Nutaraq 91 aaqqissuisoralugu. Peqatigiiffilli taanna uninnikuuvoq KNQK-milu siulittaasoq Mikkel Jeremiassen oqaluttuarpoq sukkaniunnerup kingorna naatsorsuutinik saqqummiussisoqarsimanngitsoq. Tamatuma kingorna qimussertartut peqatigiiffiat QQP pilersinneqarpoq siornalu Avannaata Qimussersua naammassimmat ukiormanna aaqqissuisussanngortinneqarluni.

Atuaruk: Avannaata Qimussersua Ilulissanut nuuppaat

- Nutaraq 91 unimmalli pasilleqattaannerit ingerlarsimapput. Uagulli KNQK-miit nalunaarutiginikuuarput oqaatigineqartut pappiaqqatigut takussutissaqanngitsut suliarisinnaanatigit. Qasigiannguani suli aaqqiagiinngittoqarpoq tamannarpiarlu pissutigalugu QQP-mi siulersuisuni ilaasortat arlallit tunuarsimapput, Mikkel Jeremiassen Sermitsiaq.AG-mut oqarpoq.

Avannaata Qimussersuata Ilulissanut nuunneqarnera ataasinngormat nalunaarutigineqarpoq. Tamanna pivoq QQPp siulersuisuini kinguleruttut allakkatigut KNQK-mut nalunaareersut sukkaniutsitsinissaq naammassisinnaanagu.

- Tamanna pinngitsoorneqarsimasinnaagaluarpoq. Uggornarpoq QQP immikkut ittumik ataatsimeersuarnermigut siulersuisunik tamarmiulersitsisimanngimmat. Ilumoorpoq suliarujussuaq pitsaasumik naammassineqareersimagaluartoq. Kisianni tassa QQP-MI siulersuisut tassaapput aalajangertut Qasigiannguani Avannaata Qimussersuaqarnissaa aaqqissuussinnaajunnaarlugu. Neriuutigilluinnarparput taamatut pisoqaqqissanngitsoq pisimasorlu tamanit ilinniarfigineqarumaartoq, Mikkel Jeremiassen oqarpoq.

Siullermeerutaasumik Avannaata Qimussersua illoqarfiit assigiinngitsut marluk suleqatigiinnerisigut ingerlanneqartussaavoq. Qimusseq 83 QQP peqatigalugu Avannaata Qimussersuanik aaqqissuisussaagaluarpoq. Qimusseq 83-lu nalunaarsimavoq toqqissisimanartinnerullugu Avannaata Qimussersuata Ilulissani ingerlanneqarnissaa Qimusseq 83ip aamma Ilulissani Qimussersaq 71-ip suleqatigiinnerisigut aaqqissuunneqartumik.

- Aamma naammagisimaarluarparput Qimusseq 83 nalunaarmat suliassartik naammassiniarlugu taamalu Ilulissani sukkaniutsitsinissami suleqataaniarlutik, Mikkel Jeremiassen oqarpoq.

Avannaata Qimussersua Ilulissani pissaaq martsip 29-at.

Powered by Labrador CMS