ukiup affaanut naatsorsuutit
KNI ukiup affaani siullermi naatsorsuutimigut pitsanngoriaateqartoq
Suliffeqarfik ukiumi naatsorsuuteqarfiusumi ukiup affaani siullermi KNI naatsorsuutimigut 46,7 million koruuninik akileraarut sioqqullugu sinneqartoorpoq 2014/15-mi, ukiup siuliani angusat 24,4 million koruuniusut
KNI-mi aqutsisoqarnikkut 2013-mi ilungersunartumik inissisimareerluni aqutsisoqarnikkut pitsaasumik ingerlaqqilerpoq.
Suliffeqarfik nalunaaruteqarpoq ukiumi naatsorsuuteqarfiusumi ukiup affaani siullermi KNI naatsorsuutimigut 46,7 million koruuninik akileraarut sioqqullugu sinneqartoorpoq 2014/15-mi, ukiup siuliani angusat 24,4 million koruuniusut.
- Ukiup affaani siullermi angusatigut ukiup siulianut sanilliullugu pitsanngoriaaat 22,3 million koruuniusup annersaa 14,3 million koruunit nioqqutissanik pilersuinermi pitsanngoriaataapput, pisortaaneq Peter Grønvold Samuelsen tusagassiutinut nalunaarummi nalunaaruteqarpoq.
Ikummatissat
Ikummatissanik pilersuinermi angusat ukiup siulianut sanilliullugit taamaaginnarput, pitsanngoriaatillu sinnerii KNI-p iluani aqutsiveqarfinni assigiinngitsuneersuupput
- KNI-mi angusat pitsanngoriartorneri pissuteqarput 'KNI 2016'-ip tungaanut periusissiaa, kiisalu aningaasartuutinik aqutsilluartoqarnera, Peter Grønvold Samuelsen oqarpoq.
- Periusissiami anguniakkat pilersaarutit naapertorlugit eqqukkiartuaarneqarput, tamakkulu aningaasatigut pitsaasumik suliffeqarfissuarmut kinguneqaleriartorput, KNI-mi pisortaaneq itisiliivoq.
Aningaasartuutit
Aningaasartuutinik aqutsilluarneq takuneqarsinnaavoq ingerlatsinermut aningaasartuutit ukioq kingulleq – ukiup affaanut - 223 million koruuniusimagaluartut maanna 198 million koruuninut appartinneqarsimanerisigut.
Ukiumi naatsorsuuteqarfiusumi 2014/15-ip ukiup affaani siullermi kaaviiaartitat katillugit 1.260 million koruuniusimapput, ukiup siulianut sanilliullugit nikinganeqangaaratik.
KNI-ip ukiup affaani siullermi naatsorsuutaa talerpiata tungaani atuarneqarsinnaavoq