KNI: Taamaammat akisunerukkajuppugut

- Taama nassuiaateqariarlunga immitsinnut aperisariaqarpugut, una inuiaqatigiit pigisaat, inuiaqatigiinnik kiffartuussinissamik siunertaqartoq piginneqatigiiffik, sumut nioqqutissat kalaallinut tunisartagassani aasarpai? Sooq nioqqutissaq, pitsaassuseq innarlinngiivillugu affaa ataatingaatsiarlugu akilik EU iluinnaani aasinnaaguniuk, sooq inuiaqatigiit suliffeqarfiup pigisaata inuiaqatigiit kiffartuussani akisunersiuutissavai?

Partii Naleqqameersoq Per Rosing-Petersen Inatsisartuni ammaanersiornermi oqallittoqarnerani taama apeqquteqarpoq.

Nunani amerlasuuni pisiarineqartartut
Nunatsinni niuernermik suliffeqarfiit annersaannit akissuteqaat naalisarlugu imaappoq, niuernermi atugassat aammalu inatsisit ilaatigut KNI pisisariaqartittarpaa akikinnerusinnaagaluamik.

- Nioqqutissat nunatsinni tuniniagassat Danmarkip saniatigut nunani allani amerlasuuni pisiarisarpavut. Nioqqutissat Pitsaasut-mik nalunaaqutsikkat Danmarkip avataani nunani assigiinngitsuni 12-ni pisiarineqartarput nioqqutissallu taakku kalaallisut oqaasertalersugaapput sumillu akoqarnerat aamma kalaallisut allagartalersugaalluni.

Tamannarpiarlu pissutaavoq Senobis KNI A/S-ip suleqatigalugu suliffeqarfimmik pilersitsigatta taamaasilluta nioqqutissanik niuerfimmut appakaassinnaaleratta taamalu akikinnerusumik nioqqutissanik pisiniarsinnaalerluta, nioqqutissanik piniartarnermi nittarsaassinermullu pisortamit Kurt Lauritsenimit allakkat taamaapput.

Qeqertarujussuaq inoqarpianngitsoq
Taassuma eqqaasitsissutigaa nunatsinni pisiniat amerlanngissusaat. KNI taamaallaat pisinianut 23.000-nut naatsorsuussanik pisisarpoq, tassalu Danmarkimi pisiniarfiup Føtexip ataatsip pisiniartorisartagaanit ikinneralaarsuit.

- Nioqqutissanik piniarnermi akit appasissappata piumasaqaataasarpoq nioqqutissanik amerlasuunik bestiiliinissaq, taamaattumik nioqqutissanik tuniniaaqqittartunik suleqateqarnissaq KNI A/S-imut avaqqunneqarsinnaanngilaq.

Saniatigut KNI ajornaallisaanissamik unammilligassaqarpoq, tassami pisiniarfiutaat tamarmik sinerissami siammarteqqammata. Amerlasuunillu pisiniarsimatillutik taakku poortoqqinneqartariaqartarput pisiniarfiit amerlasuut paletsikkaanik tigusisinnaanngimmata.

Nalunaaqutsersuinerit akitsortittarpaat
- Poortueqqinneq nioqqutissap akiata qaavanut ilanngunneqartarput taamalu nioqqutissaq akikinnerulersinnaanani, nioqqutissanik piniartarnermi nittarsaassinermullu pisortaq Partii Naleqqami politikerimut allapoq.

- Akit qaffasinnerulertarnerannut patsisaasut ilagaat nalunaaqutsersuisussaatitaanermik Nunatsinni inatsit atuuttoq. Nioqqutissanik nunani allani pisisimatilluta taakku kalaallisut, qallunaatut qallunaalluunniit oqaasiinut eqqaanartunik allagartalersugaaneq ajorput soorlu nioqqutissat atii nuna allamiut oqaasii atorlugit allataasartut.

Kurt Lauritsen isumaqarpoq, akinut nunani allani atorneqartunut naapertuuttumik akilinnik nioqqutissanik pisisarunik pisinissaminnut periarfissaqarnissaat KNI A/S-ip siunertariuaraa, susassaqarfimminili avataaniittut soorlu assartuinermut, akitsuutinut allanullu tunngasut aningaasartuutit akit qaffasinnerulernerannut patsisaaqataasartut.