KNI sanaartornermik pisortassamik atorfinitsitsisoq

Nuka Kristiansen 42-nik ukioqartoq sanaartornermut pisortatut KNI A/S-mi apriilip aallaqqaataanit sulilissaaq.

Nuka Kristiansen illussanik titartaasartutut ilinniarsimavoq ukiuni arlaqalersuni namminersorluni Sisimiuni suliffiuteqarsimalluni. Taassuma saniatigut ukiuni qulini Sanati-mi titartaasartutut ingeniøritullu suliffeqarfimmi sulisuuvoq.

KNI-p pisortarigallagaa Peter Grønvold Samuelsen oqarpoq Nuka Kristiansen nunatsinni sanaartornermut tamatigoortumik ilisimasaqartuusoq.

- Illuutit ikigisassaanngitsut aserfallassimasut KNI A/S-p maanna pigisarivai. Pisiniarfippassuit, quersuit sulisullu inigisaat qanganitsersimapput aserfallatsaalineqarnissaat nutarsarnissaallu pisariaqalivissimalluni. Qularutiginngilara sanaartornermut pisortamik maanna sulisoqalerluta iluarsaatassat ataatsimut isigalugit naliliisinnaalernissatsinnut ullutsinnullu naleqquttunik pisiniarfinnik, quersuarnik illuutinullu peqaleqqinnissatsinnut ataqatigiissumik sulisinnaasumik, Peter Grønvold Samuelsen tusagassiutinut nalunaarummi oqarpoq.

- Nuannaarutigaara KNI-mit tatiginninnermik tunineqarnera, sulilernissaralu qilanaaraara. Aserfallatsaalisassat qanoq annertutiginerisa nalilersuiffiginissaannut tamatumalu illersorneqarsinnaasumik aningaasatigut suliassaq imaannaassanngilaq pissanganarlunili. KNI-p sanaartornermut pisortassaa Nuka Kristiansen oqarpoq.

Nuka Kristiansen Sisimiuni inuuvoq illoqarfillu peroriartorfigalugu. Nuliaqarpoq pingasunillu qitornaqarlutik.