Avannaata Qimussersua

KNI qimussimik GM-ernermi taperseeqqippoq

Kalaallit Nunaanni qimussernermik pissartanngorniuttoqarnissaanut KNI ukiup aappassaa ingerlatiinnarlugu aningaasanik tapersiivoq

Meeqqat qimussernermi unammisinneqarnerannit assilineqartoq 2014-mi. Meeqqani 2014-mi ajugaavoq Saqqarmiu Frederik Jensen

Avannaata Qimussersua KNI-mit 75.000 koruuninik tapersersuivoq.

Ukiup aappassaa aningaasanik tapersiisoqarpoq.

KNI tamanna tusagassiuutinut nalunaarutigaa.

- Qimusserneq inuiattut oqaluttuarisaanitsinni pingaaruteqarpoq, sulilu avannaani tunumilu nunaqarfippassuarni illoqarfinnilu inuutissarsiornermi pinngitsoorneqarsinnaanani. Taamaattumik KNI A/S-imi tulluusimaarutigaarput ukiuni arlalinngortuni Avannaata qimussersuanut tapersersueqataasinnaanerput, KNI-mi pisortaaneq Peter Grøvold Samuelsen tusagassiuutinut nalunaarummi oqarpoq.

Avannaata Qimussersua Qeqertarsuarmi marsip 27-ani 28-anilu ingerlanneqassaaq.

Meeqqanut unammisitsinermi 20-t peqataanissaat naatsorsuutigineqarpoq, inersimasullu unammisinneqarneranni qimussit 49-t missaanniittut peqataanissaat naatsorsuutigineqarluni.

Powered by Labrador CMS