KNI pitsaanerusumik sullissinissamut millionilinnik aningaasaliivoq

Suliffeqarfissuup pisortaata Claus Jensenip kissaatigaa KNI-mi sulisut nunani allani pisiniarfiutileqatigiiffinni pitsaanerpaani sulisunut sanilliunneqarsinnaassasut

KNI-p pisortaa Claus Jensen ukiumut naatsorsuusiorfiusumut 2013-14-imut ilinniagaqartitsinernut pikkorissartitsinernullu millioninik marlunnik kisitsisitalinnik immikkoortitsivoq.

- Ilinniagaqartistineq, nioqqutissat ulluinnarni atorneqartartut akikinnerusut pisisartunullu misigisat pitsaanerusut KNI-p suliniuteqarfiisa ilagaat - inuiaqatigiinnut tamanut iluaqutaasumik, KNI-p siunissaa pillugu suliffeqarfissuup pisortaa Claus Jensen oqarpoq.

KNI-p pisortaata Claus Jensenip ukiumi naatsorsuusiorfiusumi nutaami missingersuutinut millionillit marlunnik kisitsisitallit ilanngussimavai suliffeqarfissuup sulisuisa 1.000-t ilinniagaqartinnissaannut pikkorissartinnissaannullu. Taamaasiorpoq tunngavigalugu KNI nunani allani sumiiffinnilu allani ingerlatsivissuarnut allanut sanilliullugu "nutarterneqarnissamik pisariaqartitsimmat".

- KNI-p oqaluttuarisaanerani immaqa allanngoriaatit annersaat aallartissimavarput periusissatut suliniummik "KNI 2016 tungaanut". Suliniutit assigiinngitsut katillugit 40-t tunngaviusumik pitsanngorsaasussat, atuisartumik qitiutitsisussat, siuariartornermik sammilersitsisussat isertitaqarnermillu pitsanngorsaasussat. Taamaallaat taamaasiorsinnaavugut qulakkeerutsigu sulisut tamarmik suliassaminnik kivitsinissaminnut eqqortunik tunngavissaqarpata. Taamaattumik maanna ilinniagaqartitsinernik pikkorissartitsinernillu ingerlatsilerpugut qangatut aammalu qarasaasiat internettilu atorlugit, Claus Jensen oqarpoq.

Taassuma erseqqissarpaa Pilersuisup upernaaq manna siusinnerusukkut niuertarfimmi pisortanik, niuertunik pisortanillu 80-inik sapaatip akunneranik sivisussusilimmik pikkorissartitsinera Pilersuisup periusissatut suliniutaanut ilaasoq.

- Maanna ilinniartitsineq tamanna pisiniarfitsinni qullersaqarfitsinnilu sulisunut 700-nut ingerlateqqissavarput. Ilinniagaqartitsinikkut pikkorissartitsinikkullu qulakkiissavarput aallaqqaataanit iliuusissat eqqortumik ingerlatissagivut. Kalaallit Nunaanni nunaqarfinnguani atuisartut nunani allani pisiniarfiutileqatigiinni ingerlalluartuni sullinneqarnerisut sullinneqartariaqarput. Taamaattumik qullersanut pingaaruteqarpoq Pilersuisumi sulisut naammagisimaarinninnerannik tulluusimaarinninnerannillu pilersitsinissaq. Tamanna atuisartunut naammagisimaarinnittunut aqqutissaavoq.

Periutsimi tamarmiusumi anguniagaavoq isertitat pitsanngoriartinnissaat.

- Aningaasartuutitta ilarpassui aalajangersimasuupput. Taamaattumik nioqqutissamik ataatsimik tunisavut amerlaneruppata ataasiakkaat akii appariarsinnaapput. Ataqatigiinnerit tamakkua paasiumallugit ilinniagaqartitsisoqassaaq pikkorissartitsisoqassallunilu. Aamma pingaaruteqarluinnarpoq pisisartut nettimi pisiniarfitsinni Pisisa-gl-imi pisisartut tamatumunnga Pilersuisup pisiniarfiini tamani ikiorneqarsinnaanissaat, Claus Jensen oqarpoq.

Powered by Labrador CMS