KNI Pilersuisoq: Aalajangersimasumik akikitsut atugaalluarput

Pisiniarfiutileqatigiiffiiat annersaat 65-inik pisiniarfiutilik, KNI Pilersuisoq, ulluinnarni nioqqutissanut 300-nut "Aalajangersimasumik akikitsut"-mik iluatsitsilluarsimavoq.
– Pisisartut bonuspointit sorsuutigissanngilaat imaluunniit akikilliliissutit naatsorsussanngilaat. Akit ullut tamaasa taamaaginnarput. Tamanna pisisartut iluaraat nioqqutissallu tamarmik "Aalajangersimasumik akikitsut" kaaviiaartinnerat 10 procentimik siuariarsimavoq, KNI-mi pisiortornermut ussassaarinermullu pisortaq Kurt Lauritsen tusagassiorfinnut nalunaarutikkut allappoq.
Nioqqutissat pisiarianeqarnerpaasartut tassaapput safti, qaqorteqqasut, qajuusat aamma pizzat.
– Pisisartut akit ilisimanerat nuannaraat - bonuspointinik eqqarsassanatik imaluunniit akikilliliissutinik naatsorsuissanatik. Nioqqutissat tamakkua ataatsimik akeqartippavut - ataatsimik pisigaanni imaluunniit 1.000-nik pisigaanni, Kurt Lauritsen oqaluttuarpoq.
"Aalajagnersimasumik akikitsut"-mik isumassarsiaq Danmarkimeersuuvoq, tappavani KNI-p pisortaanera Claus Jensen qallunaat niuertarfiutileqatigiiffissuanni najoqqutassaq taanna atorsimammagu iluatsilluartorujussuarmik. Tassani pineqarpoq nioqqutissat aalajangersimasut kaaviiaartinnerisa annertusinerisigut akinik pitsaanerusunik pilersuisumit pissarsisoqarsinnaanera - taamaasillunilu nioqqutissanut pitsaanerusunut sanilliullugu akit 45 procentit angullugit appartinneqarsinnaallutik.