ukiup affaanut naatsorsuutit
KNI-p ukiup affaanut naatsorsuutai ukiup siulianut sanilliunnerini assigiingajattut
Ukiup affaani siullermi suliffeqarfissuaq akileraarutit akilerneqannginnerini 60 million koruuninik sinneqartoorpoq, tassa ukiup siulianut sanilliunnerani assigingajallugu
KNI ukiumi naatsorsuuteqarfigisami 2017/18 affaani siullermi akileraarutit suli akilernagit 60 million koruuninik sinneqartoorpoq, ukiup siuliani 2016/17 ukiup affaanut angusat 65 million koruuniusimapput.
Suliffeqarfissuaq tusagassiuutinut nalunaarummi paasissutissiivoq.
- 2016/17-imi ukiup affaanut naatsorsuutitigut sinneqartoorutit 5 million koruniinik ikinnerunerat annertunerpaamik pissuteqarpoq ikummatissamik pilersuinermi sinneqartoorutit ikilinerannit, tamatumali paarlattuanik nioqqutissanik pilersuinermi sinneqartoorutit amerlinerinit, KNI tusagassiuutinut nalunaarummi paasissutissiivoq.
Suliffeqarfissuup ingerlataani allanissaaq ukiup siulianut sanilliullugu ukiup affaani siullermi 900.000 koruuninik sinneqartoorutit pitsanngoriarput.
Ukiumi naatsorsuuteqarfiusumi 2017/18 ukiup affaani siullermi kaaviiaartitat 1.250 million koruuniupput, ukiup siulianut 30 million koruuninik amerleriarlutik.
- Taakkunannga 703 million koruunit nioqqutissanik pilersuinermi kaaviiaartinneqarput, 539 million koruunit ikummatissamik pilersuinermi kaaviiaartinneqarlutik. Nioqqutissanik pilersuinermi kaaviiaartitat ukiup siulianut sanilliullugit taamaaginnarput, ikummatissanilli pilersuinermi kaaviiaartitat 4,7 procentimik qaffariarput, tusagassiuutinut nalunaarummi oqaatigineqarpoq.
Ukiumi naatsorsuuteqarfiusumi 2017/18-mi ukiup affaanut angusat aallaavigalugit missingersersuutigineqareersimasutut KNI ukiumoortumik 105 - 110 million koruuninik sinneqartooruteqarnissaa ilimagineqarpoq.