niuerneq
KNI-p sinneqartoorut 11 millionit koruuninik annertusivaa
Ingerlatsivik Namminersorlutik Oqartussanit pigineqartoq siumut ingerlavoq. Kisianni siunissamut isigaluni Pilersuisoq eqqarsaatigalugu ammut aallartussaasoq ilimagineqartoq, aqutsisut erseqqissaapput
Ukiumi naatsorsuuteqarfiusumi 2015/16 ukiup affaani siullermi KNI naatsorsuutimigut 57,4 millionit koruuninik akileraarut sioqqullugu sinneqartoorpoq.
Tamanna ukiup siuliani ukiup affaani siullermi angusanut sanilliullugu angusat 10,7 millionit koruuninik pitsanngoriaateqarpoq. Ingerlatsiviullu siulersuisui tamanna tunngavigalugu naammagisimaarinnipput.
Nuannaajallannartoq
- Ukiup affaani siullermi angusaq nuannaajallannartuuvoq tamanna tunngavigalugu ilimanarsimmat ukiumi naatsorsuuteqarfiusumi ukioq tamakkerlugu 100 millionit koruuninik sinneqartooruteqarnissaq siunniunneqareersoq piviusunngortinneqarsinnaalerunarmat, aqutsisut tusagassiorfinnut nalunaarumminni allapput.
KNI-lli pisortaasa tamatuma saniatigut tikkuarpaat, ingammik Pilersuisoq eqqarsaatigalugu sinneqartooruteqartitseqqileraluarneq ukiuni pingasuni tallimani atuutsinneqarsinnaasoq, ukiunili aggersuni ammut aallaqqittussaasoq siumoortumik ilimagineqareerpoq.
Innuttaasut ikiliartortut
- Tassami nunaqarfinni illoqarfinnilu isorliunerusuni innuttaasut ikiliartorput, aserfallatsaaliugassat kinguaattoorutit millionillit untritillinnik arlaqartunik akeqartussat isumaginiarneqartussaapput, kiisalu tamakku qaavisigut piginnittut imminnut agguagarsisinneqartarnerat kiffartuussisussaatitaanermut isumaqatigiissummut akiliutaagaluartumut annikillisaavoq, aqutsisut erseqqissaapput.
Ukiumi naatsorsuuteqarfiusumi ukioq tamakkerlugu sinneqartoorluarnissaq ilimanarsimmat, KNI naapertorlugu aamma sanaartugassatigut iluarsaatassarpassuit nioqqutissanik ikummatissanillu pilersuinerup iluani annikillisinneqarsinnaalissapput.
Iluanaarutit pitsanngortilllugit
Sinneqartoorutit annertusineqarnerat nioqqutissanik ikummatissanillu pilersuinermi angusat pitsanngoriartinneqarnerinit pissuteqarpoq. Pitsanngoriaat nioqqutissanik pilersuinermi Pilersuisumi 6,9 millionit koruuniuvoq, ikummatissanillu pilersuinermi Polaroilimi pitsanngoriaat 4,3 millionit koruuniulluni.
KNI-mi angusat pitsanngoriartorneri pissuteqarput ‘KNI 2016-ip tungaanut’ periusissiaani siunnerfiit piviusunngortiterneqarnerannit, kiisalu aningaasartuutinik aqutsilluartoqarneranit aningaasartuutikillisaasoqarneranillu. Illuutit atorunnaartut aamma tunineqarsimapput, taamaalillunilu ingerlatsinermi nalikilliliinerit aamma sipaarutigineqarsimallutik.
Aningaasartuutit ikinnerusut
Suliffeqarfimmi aningaasartuutit 2,4 millionit koruuninik ukiup siulianut sanilliullugit ikileriarput 195,6 millionit koruuninngorlutik. Taakku nalinginnaasumik ingerlatsinermit sipaarutigineqarput, ilaatigut avtaanit siunnersortaasartunit.
Ukiumi naatsorsuuteqarfiusumi 2014/15-ip ukiup affaani siullermi kaaviiaartitat katillugit 1.217 milliardiusimapput, ukiup siuliani ukiup affaanut sanilliullugit 44 millionit koruuninik ikileriarlutik.
Kinguariarneq
Taakkunannga 650 millionit koruunit nioqqutissanik pilersuinermi kaaviiaartinneqarput, 560 millionit koruunillu ikummatissamik pilersuinerminngaaneerlutik. Nioqqutissanik pilersuinermi kaaviiaartitat 1,1 procntimik qaffariarput, ikummatissanilli pilersuinermi kaaviiaartitat 7,7 procnentimik appariarlutik, KNI ilisimatitsivoq.
Pilersuisup pisiniarfiini siuariartoqarpoq, KNI Engrosimili ingerlatat 2,8 procentimik kinguariarfiusimallutik.
Sermitsiaq.AG-p KNI pillugu allaaserisai tamaasa uani atuakkit