silarsuarmut
KNI-p nunani allani ilinniartut arfinillit aningaasaliiffigaat
Niuernermik suliffeqarfik efterskolemi- aamma AFS-erlutik atuartut arfinillit nunani allani ilinniartut taperserniarlugit aningaasaliiffigaat
Aktieselskabip KNI-p aalajangiuppaa sulisumi meeraat efterskolerniartut AFS-iluunniit aqqutigalugu atuariartorniartut ilaannakortumik tamakkiisumilluunniit aningaasaliiffigisalerniarlugit.
Inuusuttummi nunani allani misilittagaqartut suliffeqarfiup pisariaqartippai.
- Inuusuttut tassaammata KNI A/S-ip siunissami atorfissaqartilluinnaqqissaagassai, pisortaaneq Peter Grønlvold Samuelsen oqarpoq.
Avataani pisunik malinnaasut
- Suliffeqarfiup siunissamini pisariaqartitaanut inuusuttut avaqqunneqarsinnaanngillat, tassalu inuusuttut avatitsinni najugaqarlutik misilissimasut taamalu nunatta avataani pisunik malinnaasut.
Suliffeqarfimmi KNI-mi sulisuugaanni, meeqqat nunani allani ilinniarialerpat ilaannakortumik tamakkiisumilluunniit aningaasaliiffigineqarnissaanut qinnuteqartoqarsinnaavoq.
Arfinillit taperneqassapput
- Aningaasat immikkoortinneqartut efterskolernianut pingasunut AFS-ilu aqqutigalugu atuariaqartorniartunut pingasunut atugassiaapput, pisortaaneq nalunaarpoq.
KNI-mi pisiniarfinni nioqqutissanik ikummatissanillu pilersuineq sulisut 1000-it missaanniittut isumagisaraat.
Atuaruk: Royal Greenland CSR-imik nutaamik suliniuteqarpoq