KNI-p Jan H. Lynge-Pedersen pisortaagallartutut atorfinitsippaa
Aningaasaqarnermut Nunallu iluani Pissutsinut Naalakkersuisoqarfimmi pisortatut tunuarsimasoq Jan H. Lynge-Pedersen KNI A/S-imi aningaasaqarnermut pisortaagallartutut atorfinitsinneqarpoq, nutaamik atorfinitsitsisoqarnissaata tungaanut
2013-imi decembarip aallaqqaataanit KNI A/S-ip Jan H. Lynge-Pedersen aningaasaqarnermut pisortaagallartutut atorfinitsippaa. Jan H. Lynge-Pedersen taamatut atorfinitsitaagallarpoq nutaamik atorfinitsitsisoqarnissaata tungaanut. Aningaasaqarnermut pisortatut atorfik aatsaat inuttassarsiuunneqarumaarpoq pisortaanermik nutaamik nassaartoqareerpat, KNI tusagassiorfinnut nalunaarutikkut paasissutissiivoq.
Jan H. Lynge-Pedersen amerlanerpaat ilisimavaat Aningaasanut Nunallu iluani Pissutsinut Naalakkersuisoqarfimmi tunuarami angisuumik soraarnerussutisiaqartinneqarsimasutut. Taanna 47-nik ukioqarpoq cand. merc.-itut ilinniagaqarsimalluni, 1994-imiillu ilaatigut Namminersornerullutik Oqartussani Aalisarnermut Pisoqartaqarfimmi, Air Greenland A/S-imi, Nuna Oil A/S-imi aamma Namminersorlutik Oqartussani Aningaasaqarnermut Naalakkersuisoqarfimmi sulisimavoq, tassanilu ukiuni kingullerni sisamani pisortaasimalluni.
Aamma atuaruk: Pisortaaneq tunuarpoq
Aamma atuaruk: KNI-p siulittaasua kamappoq
Aamma atuaruk: Kreditbankit KNI-mi paatsiveqannginneq isumakulunnartippaat
Aamma atuaruk: KNI-p siulittaasua: Ippinnartoqarnera soraarsitsinermut pissutaavoq
KNI A/S-ip manna tikillugu aningaasaqarnermut pisortaa soraarniuteqarsimavoq, ikaarsaariarnermili piffissami sivikinnerusumi siunnersortitut sulissalluni, pingaartumik suliassani KNI-p aningaasatigut suleqatigisaanut tunngasut naammassiniarlugit, soorunamili aamma Jan H. Lynge-Pedersenip suliassaanik ilisarititsinermi peqataassalluni.
– Naammagisimaartorujussuuvara suliassamut pissanganartorujussuarmut pisortaagallartutut atorfininnissaanik kajumissaarutiga Jan H. Lynge-Pedersenip akuerimmagu, taamaasilluni KNI-p ulluinnarni aqutsisuini peqataalerluni. Uanga nammineq taassuma atorfeqarallarnera atussavara sulinermi avatangiisinik toqqissisimanartunik pilersitsinermut, aqutsisoqatigiit suliaasa ataqatigiissaarneranut, taamaasilluni aningaasaqarnikkut nukittuumik aqutsisoqalerluta, pisortaagallartoq Peter Grønvold Samuelsen oqarpoq.
– Tamanna peqatigalugu oqaatigisinnaavara naatsorsuuserinermi pisortaq Per Jensen, ukiup matuma naaneranit tunuarniuteqarsimagaluartoq, suli KNI-miiginnassammat, aamma ukiortaap kingorna, KNI-p naatsorsuuserinermi pisortamik nutaamik nassaarnissaata tungaanut, Peter Grønvold Samuelsen oqarpoq.