KNI
KNI-mik ingerlatsisussat inissitsiterneqartut
Ilaatigut KNI A/S-imi pisortaanermik atorfinitsitisoqarpoq
Polaroil-imi pisortaasimasoq 53-nik ukiulik Peter Grønvold Samuelsen, ukiup affaani kingullermi KNI A/S-imi pisortaanerugallartooreerluni juunip aallaqqaataanit pisortaaninngorpoq.
- Taamaalilluni KNI pisortaqarnerup tungaatigut nalinginnaasumik ingerlaqqilissaaq.
KNI tusagassiutinut nalunaaruteqarpoq.
Pisortaanermik atorfinitsitsinerup saniatigut maannamut aningaasaqarnermut pisortaagallartitaasoq Jan H. Lynge-Pedersen, aningaasaqarnermut pisortatut atorfinitsivinneqarpoq, kiisalu naatsorsuuserinermut pisortaq Per Jensen novembarimi ukioq kingulleq atorfimminit tunuarniarluni ilimasaaruteqarsimagaluartoq atorfinitsivinneqarpoq.
Polaroil-imi pisortatut Peter Grønvold Samuelsenip atorfik qimataa Tage Lindegaard-imit ukiup affaani kingullermi Polaroil-imi pisortaagallartuusimasumit kingoraarneqassaaq.
- Nuannaarutigaara siulersuisut tamarmiusut nunat tamalaat akornanni pisortassarsiuisarfeqar-fimmik tusaamasaalluartumik Korn Ferry-mik suleqateqarluarlutik Peter Grønvold Samuelsen-ip atorfinitsinneqarneranut tunuliaqutaammata, KNI-imi siulersuisuni siulittaasoq Niels Thomsen oqarpoq.
- KNI-p isumagisassaqarfii assigiinngiiaarlutik initoqimmata pisortaanissap tamatigoortumik piginnaaneqarnissaa tulluarnerusorivarput, immikkuualuttut arlaannut taamaallaat pikkorissarsimanani, kisiannili silittumik aqutsinerup tungaatigut periusissiornerullu tungaatigut pissutsinut assigiinngiiaartunut takunnipallassinnaallunilu sulisorisatigut anguniakkanik takorluukkanillu piviu-sunngortitsisinnaassuseqarnissaa, sulisorisat piginnaasaat atorluarlugit. Pisortaaneq siuttuusinnaassuseqartoq, nakimaalluni kimilimmik aalajangiisinnaassuseqartoq, peqqissaartoq pissuserissorlu. Piginnaanerit tamakku Peter Grønvold Samuelsen-ip Polaroil-imi pisortaanermini KNI-milu qaammatini kingullerni arfinilinni pisortaanerugallartutut sulinermini uppernassusilimmik takutissinnaasimavai.
Ajornartorsiutit 2013-mi aallartittut
Siunnersortinik millioninik aningaasarsialinnik atorfinititsinerit, ilaquttanik Danmarkimut aallartunik akiliussinerit kiisalu pissutissaqanngitsumik KNI-p qamuteralaanik attartornerit. Ilaatigut tamakku pissutigisaanik KNI-p siulersuisuisa ingerlatsisuinik taarseraatitsivoq, pisortarlu Claus Jensen novembarip 15-ani soraarsitaalluni.
Naatsorsueqqissaartarfik Deloittep KNI-mik misissuereernermi taama pisoqarpoq.
KNI-mi ingerlatsisut siulersuisullu arlaqartut namminneq kajumissutsiminnik tunuartut arlaqarput tamatuma kingorna, ilaatigut aalassassutaasumik.
Assit marluk takukkit