KNI-mi pisortaaninngortoq: Sangujoqilaarluni ingerlatsineq unissaaq

Peter Grønvold Samuelsen, ukiup affaani kingullermi KNI A/S-imi pisortaanerugallartooreerluni juunip aallaqqaataanit pisortaaninngortoq Sermitsiaq.AG-mi allaaserineqareerpoq.

KNI-p siulersuisuini siulittaasoq Niels Thomsen oqarpoq 'Pisortaaninngortup suliffeqarfissuup maannakkut allanngortikkiartuaarneqarnera siuttuuffigissagaa – tassalu KNI-p pilersuisussaatitaanini kisiat qitiutinnagu, aammattaarli pisisartunik qitiutitsi-nerulernissaminik suliniuteqarnera timitalersussallugu.'

- Suleqatigiinnissarput siulersuisut tungaanniit qilanaarutigaarput, maannamullu anguneqareersimasunut sanilliullugu suli erseqqinnerusumik, KNI suliffeqarfittut nutaaliaasutut, qiilasutut, naleqqussarluarsinnaasutut niuernikkut aningaasarsiorluarsinnaasutut inuiaqatigiinnilu pingaarutilimmik suliassaqarnerminik ilisimaarinnilluartutut ingerlanneqalernissaanut, Niels Thomsen oqarpoq.

Suliffik pitsaasoq
Peter Grønvold Samuelsenip tamanna isumaqatigaa, kiisalu oqaatigaa:

- KNI-p pilersuisussaatitaasuunerminik qitiutitsinerminiit pisisartunik qitiutitsineruleriartornissaa soqutiginartippara, puigussanngilarpulli KNI A/S inuiaqatigiinni pisussaaffiligaammat, inoqarfinni aningaasarsiornerinnavik tunngavigalugu ingerlatsiffiusinnaanngitsuni allaat inuuniarnermi pingaaruteqarluinnartunik pilersuisussaatitaalluni, pisortaaninngortoq Peter Grønvold Samuelsen oqarpoq nangillunilu:

- Misigisimavunga suliassaq soqutigalugu, akisussaaffimmut angeqisumut maniguuppunga, suliffeqarferujussuullu patajaatsumik aqunneqarnissaa qulakkeerusullugu. KNI A/S ukiuni kingullerni arlaqalersuni sammivissaasuasutut sangujoqilaarluni ingerlasimavoq, periusissiat nikittaattut suleriaatsit assigiinngitsut atulersinneqaqattaarsimapput, tamannalu soorunami sulisunut annertuumik unammillernartuusimavoq.

Suliffik nuannersoq
Siunnersortinik millioninik aningaasarsialinnik atorfinititsinerit, ilaquttanik Danmarkimut aallartunik akiliussinerit kiisalu pissutissaqanngitsumik KNI-p qamuteralaanik attartornerit ilaatigut pissutigalugit pisortaanerusimasoq Claus Jensen ukioq kingulleq novembarimi soraarsitaavoq.

- Maanna pingaaruteqarpoq suliffeqarfiup iluani suliffigissaanissaq, sulisut sumi inissisimanertik aallaavigalugu suliassaminnik nalorniseqarnatik erseqqissunik najoqqutassaqartitaallutik sulinissaat toqqammavississallugu. Suliffimmi qiimaneq toqqissisimanerlu uterteqqittariaqarpagut, Grønvold Samuelsen oqarpoq.

KNI-mi ingerlatsisut siulersuisullu arlaqartut namminneq kajumissutsiminnik tunuartut arlaqarput tamatuma kingorna, ilaatigut aalassassutaasumik.