KNI-mi pisortaanerugallartoq toqqarneqarpoq

KNI-p nukissiuutinut immikkoortoqarfiani Polaroil-imi pisortaq Peter Grønvold Samuelsen namminersorlutik oqartussat niunermik selskabianni pisortaagallartussatut toqqarneqarpoq Claus Jensenip soraarsinneqarnerata kingorna.
Tamanna Sermitsiaq.AG-p paasivaa.
Naatsorsuutigineqarpoq tamanna ataasinngornerup ingerlanerani nalunaarutigineqarumaartoq.
Peter Grønvold Samuelsen 2008-miilli Polaroil-imi pisortaasimavoq tamannalu sioqqullugu ilaatigut SIK-p soraarnerussutisiaqalernissamut aningaasaateqarfiani Sisa-mi pisortaasimavoq.
Atuaruk: "KNI-p pisortaanera soraarsitaavoq"
Atuaruk: "KNI-mi eqqissiviilliorneq"
Siulersuisuni amerlanerussuteqartut tallimanngormat suliffeqarfissuup pisortaa soraarsippaat. Claus Jensenillu soraarsinneqarnera pivoq piffissami sivisuumi ingerlatsivimmi toqqissisimanngitsoqareersoq, tamatumani sulisoq ataaseq arlallilluunniit kinaassusertik isertorlugu siulersuisunut allagarsimammata pisortallu aningaasatdigut aqutsinera pisortatullu aqutseriaasia maalaarutigalugu. Tamatuma saniatigut Sermitsiaq.AG-p paasisai malillugit siulersuisunut ilaasortat katillugit pingasut, tamarmik qallunaat nunaanni inuussutissarsiornermik tunuliaqutallit, ingerlatsivimmi pissutsit atuuttut pissutigalugit qanittukkut tunuarsimapput.
Taakkua tassaapput Marianne Wiinholt, Karen Sofie Hansen-Hoeck aamma Liselotte Grønborg Lundberg.
KNI-p siulersuisuini siulittaasoq Niels Thomsen imaluunniit Peter Grønvold Samuelsen oqaaseqartissinnaasimanngilagut.