unammillerneq

KNI ilumuunnginneraavoq: Pisortat aningaasaataat atorlugit unammillinngilagut

Niuernermik selskabi pillugu Sulisitsisut Peqatigiiffiata oqaaseqaatai KNI-p siulersuisuini siulittaasup Niels Thomsenip pakatsissutigai

Foto af KNI's pilersuisoqbutik i Qasigianngiut

KNI-p siulersuisuini siulittaasup Niels Thomsenip Sulisitsisut Peqatigiiffiat (GE) kakkagivallaanngilaa.

Akaarinninnginneq pilerpoq kattuffiup pisortaata Brian Buus Pedersenip qanittukkut mianersoqqussutigimmagu KNI-p pisiniarfiutileqatigiiffimmut Pisiffimmut unammillernini annertusigaa.

Nusuka kaammattuisuuvoq

Sulisitsisut peqatigiiffiat Nusuka Pisiffimmut annertunerusumik unammillernissamik siunnersuisuuvoq, pisiniarfiutileqatigiiffiup, pingaartumik qallunaanit pigineqartup, tuniniaaviup ilarujussua tigummimmagu, kingullermillu aamma Nuummi ilulissanilu elektronikkinik tuniniaanini annertusimmagu.

Assortuussutiginagu

Niels Thomsenip erseqqissarpaa pisiniarfiutileqatigiiffik Pilersuisoq eqqarsaatigalugu KNI-p siunissami periusiginiagaa maannakkorpiaq tamanut ammasumik akerleriissutigiumanagu.

– Tupigusuutigaarali pakatsissutigalugulu GE uungaannavik isigisumik illersuiniarpasissumillu Pisiffimmik isiginnimmat, taamaasillunilu apeqqut oqimaaqatigiinnerusumik isummerfiginiarnagu, Niels Thomsen pisimasoq pillugu allakkatigut ammasutigut allappoq.

Pisortat aningaasaataannik?

Tamatuma saniatigut siulersuisuni siulittaasup nuannarinngilaa Brian Buus Pedersenip oqaaseqaatai ´isumaqalersitsimmata KNI selskabiusoq ´pisortat aningaasaataannik tunuliaqutaqarluni´ namminersortunik unammillertuusoq.´

– Ilinnut paasissutissiissutigissavara KNI illoqarfinni arlalinni pisiniarfinnik ingerlatsimmat ´pisortat aningaasaataannik tunuliaqutaqarani´, Pisiffimmik, Brugsenimik pisiniarfinnilluunniit mikinerusunik allanik toqqaannartumik unammillerluni. GE-p oqaaseqaatai imatut paasineqassappat KNI-p ingerlatani taanna unitsissagaa? Imaluunniit atuisartut eqqarsaatigalugit KNI illoqarfinni tamakkunani ingerlatsisuusoq, Niels Thomsen aperivoq.

Uppernarsaatissaqarpoq

Tamatuma saniatigut tikkuarpaa KNI-p qaqugukkulluunniit uppernarsarsinnaagaa selskabip aningaasarsiorluni ingerlatai, aammalu Namminersorlutik Oqartussanit akilerneqarluni ingerlatai avissaartitaalluinnarsimasut, taamatuttaarlu selskabip nukissamut nioqqutissanullu immikkoortui avissaarsimalluinnartuusut.

Atorsinnaanngitsutut iliorfigaa

– Taamaattumik akuersaarsinnaanngilara innuttaasut ima isumaqalersikkakkit KNI sullissinissamik isumaqatigiissutit avataanni aningaasarsiornernik atugassaqarluni ingerlatsisinnaanngitsoq. Taamatut pissusilersornermigut GE-p KNI ilaasortami akiliisartut annerpaat ilaattut atorsinnaanngitsutut iliuuseqarfigaa, Niels Thomsen allappoq, tamannalu peqatigalugu tupisuguutigaa Sulisitsisut Peqatigiiffiat KNI pillugu oqaaseqaateqarmat - ingerlatsivik ilaasortani attaveqarfigeqqaarnagu.

Powered by Labrador CMS