KNI 86 million koruuninik sinneqartooruteqarpoq

KNI ukiup tulleriit ingerlatiinnarlugit angusaqarluarpoq.

Tassami akileraannginnermi 86,1 million koruuninik suliffeqarfik Namminersorlutik Oqartussanit pigineqartoq sinneqartooruteqarpoq. Ukiumut kingullermut sanilliullugu angusaq 23,8 million koruuninit pitsaaneruvoq.

Siulersuisut ataatsimeereernerisa kingorna tamanna nalunaarutigineqarpoq.

Kaaviiaartitat
Suliffeqarfiup milliard koruuninik kaaviiaartitaqarnera pissutigalugu angusarissaarluarpoq. Tassami KNI-p 2,5 milliard koruuninik kaaviiaartitaqarpoq, ukiumut kingullermut sanilliullugu 59,4 million koruuninik pitsaanerulluni.

Angusarineqartoq KNI-p siulersuisuisa angusaq naammagisimaarpaat. 2016-mut anguniagarineqartoq ingerlalluartutut nalilerneqarluni.

Suliffeqarfik niuernikkut sullissinikkullu nutarsaanissaa tassani anguniagarineqarpoq.

Sunniuteqaqataalluartoq
KNI-p suliffeqarfiutaa Polaroil angusarissaartitsilluaqqippoq.

Polaroil akileraarusiinnginnermi 61,5 million koruuninik sinneqartoorpoq.

Angusarineqartoq 7,4 million koruuninik pitsaanerulerpoq, tassani nunaqarfinnut nunaqarfinnullu ikummatissanik kiffartuussinerup pitsaanerulernera pissutaaqataavoq.

Taamaakkaluartoq aatsitassarsiornissamut suliaqartussanut ikummatissanik tunisinissamut naatsorsuutigineqartumit annikinneruvoq, tamanna kaaviiaartitsinermut malunnaateqarpoq. Ukiuniilli kingullernit angusarineqartoq aamma pitsaaneruvoq.

Sinneqartoorut qaffariartoq
Aamma pisiniarfik ingerlatarineqartoq Pilersuisoq ukiumit kingullermit sanilliullugu ingerlalluarneruvoq. Akileraarusiinnginnermi 22,2 million koruuninik sinneqartoorpoq, ukiumut kingullermut sanilliullugu 19,5 million koruuninik angusaq pitsaanerulluni.

Pilersuisoq 80 million koruuninik kaaviiaartitaqarpoq. Engrosinik tunisaqarneq pitsaanerulerpoq, taamaakkaluartorli illoqarfinni nunaqarfinnilu pisiniartartut ikiliartornerat malugineqarpoq.

Namminersorlutik Oqartussanik kiffartuussinermik isumaqatigiissuteqarfiusut ukiuni kingullerni qulini 10,9 procentimik ikileriaateqarput.

KNI katillugit 742-nik sulisoqarpoq, 2011-mut sanilliullugu sulisut 79-nik ikileriaateqarlutik.

Taarsiisoqanngilaq
KNI-mi siulersuisut tamarmik inissaminniiginnarput.

Siulittaasuuvoq Niels Thomsen, Høgni Hansen, Bodil Nyboe Andersen, Julia Pars, Annette K. Sadolin aamma Jørn Rosenberg siulersuisuni ilaasortaallutik.

Sulisunit siulersuisuni ilaasortaapput Mikol Heilmann, Dorthea Isaksen kiisalu Inger Eriksen