ukiumoortumik naatsorsuutit
KNI 100 millioner koruunit sinnerlugit sinneqartooruteqarpoq
Selskabi namminersorlutik oqartussanit pigineqartoq ukiumi naatsorsuusiorfiusumi 2015/16-imi sinneqartooruteqarluarpoq
Akileraarutit suli ilanngaatiginagit 101 millioner koruunit.
Selskabi namminersorlutik oqartussanit pigineqartoq KNI A/S ukiumi naatsorsusiorfiusumi 2015/16-imi taama amerlatigisunik sinneqartooruteqarpoq.
Taamaasilluni KNI suliffeqarfissuup oqaluttuarisaanerani angusat pitsaanerpaat ilaannik angusaqarpoq.
Pisortaq naammagisimaarinnippoq
KNI-p nutaanerulersinniarneranik suliniuteqarnermi nioqqutissanik immikkoortoqarfik pingaarnerusumik sammineqarsimavoq.
– Nioqqutissanut immikkoortoqarfik maanna sinneqarlooruteqarluartalerpoq, tamannalu ilaatigut anguneqarsimavoq pilersuinerup pitsaanerusumik sammineqarneratigut, immikkoortut aqunneqarnerisigut kiisalu ingerlatsinermi piginnaasaqarluarnikkut, KNI-p pisortaa Peter Grønvold Samuelsen tusagassiorfinnut nalunaarutikkut oqarpoq.
Taamaasilluni selskabip nioqqutissanut immikkoortoqarfianni ingerlatsineq 34 millioner koruuninik sinneqartooruteqarfiusimavoq, ukiumi naatsorsuusiorfiusumi siuliani sinneqartoorutit 22 millioner koruuniusimasut.
Landskarsimut 20 millionit
Selskabip nukissamik immikkoortoqarfia Polaroil 64,1 millioner koruuninik sinneqartooruteqarpoq, ukiumi naatsorsuusiorfiusumi siuliani 61,5 millioner koruuninik sinneqartooruteqarsimalluni. Akileraarutit ilanngaatigereerlugit angusat 68 millioner koruuniupput, namminerlu aningaasaatit 787 millioner koruuniullutik.
KNI-p piginnittua, Namminersorlutik Oqartussat, isumaqatigiissuteqarfigineqarnera naapertorlugu ukiumi angusanit 20 millioner koruuninik iluanaarutisiaqartitsisoqarpoq.
Tamatuma saniatigut KNI ukiumi naatsorsuusiorfiusumi 2015/16-imi inuit akileraarutaatigut 72 millioner koruuninik selskabillu akileraarutaatigut 12 millioner koruuninik akiliuteqarsimavoq.
Ukiup naatsorsuusiorfiusup naanerani KNI 918-inik sulisoqarpoq, tassa tamakkiisumik atorfinnut 747-nut naapertuuttumik.