KNAPK: Taamaasiortoqarsinnanngilaq

Upernavik Seafoodimi qalerallit tulaanneqartartut akii kilomut appartinneqarput ataasinngormat. Tamanna pivoq umiarsuaq tunitsiviusoq aalisakkerivimmut unammillertaasup aallareerneratigut, taamaasilluni Upernavik Seafood kisermaassisunngoqqilluni. Aamma Royal Greenland KNAPK-lu isumaqatigiissuteqarfigineqarput Uummannap sulluani qanoq qaleralinnut kilomut akeqartitsisoqassanersoq. Isumaqatigiittoqarsimanera KNAPK-mit iluarineqanngilaq.

Qaleralinnik tunitsivinni Upernavimmi unammilleqatigiittoqaraluarpoq, tassani Suluk Fish Aps aamma Halibut Greenland umiarsuarnik tunitsivinnik tulaassinissamut akuerineqarmata. Unammilleqatigiittoqarallarmat qalerallit kilomut 15 koruuninit 20 koruuninut qaffanneqarpoq. Unammillertut umiarsuarmik tunitsiveqartut allamut aallarneranni akigitinneqartut appaqqinneqarput.

Pitsaasuunngitsoq
Uummannap Sulluani akinik isumaqatigiissusiortoqarsimanera KNAPK-mit iluarineqanngilaq.

- Uummannap Sulluani qalerallit pillugit KNAPK-p Royal Greenlandillu isumaqatigiittoqarnerani Upernavik Seafood sumilluunniit tunngassuteqanngilaq, Upernavimmi ingerlatsinermut aamma attuumassuteqanngilaq, KNAPK-p pisortaa Petrus Biilmann Upernavik Seafoodip pisortaanut Flemming Andersenimut oqarpoq. Nalunaarut ilaasortanut tusagassiuutinullu nassiuppaa.

Petrus Biilmannip nassuiarpaa isumaqatigiissut aalisakkerivinnut allanut tunngassuteqanngitsoq. KNAPK aamma isumaqarpoq Upernavik Seafoodip akinik appaanera nuna tamakkerlugu eqquisinnaasoq.