saarullittassiissutit amerlanerit

KNAPK saarulliit pillugit TV-iikkut oqallinnissamik kaammattuisoq

Aalisartut piniartullu kattuffiat KNAPK saarulleqassasuseq pillugu TV-iikkut radiukkullu aalisartunit, politikerinit biologinillu peqataaffigineqartumik oqallinnissamut kaammattuivoq

KNAPK-p pisortaa Petrus Biilmann siulittaasualu Henrik Sandgreen pisassiissutit pillugit siusinnerusukkut oqallinnermi. KNAPK-p siulittaasuata Pinngortitaleriffik saarulleqassuseq pillugu paatsiveerutsitsisutut maanna pasillerpaa.

Saarullittassiissutigineqartut 25.000 tonsit pillugit ulluni kingullerni oqallinnerup aalisarnermut naalakkersuisup partiit naalakkersuisooqataasut ilaasortaannit isornartorsiorneqarfigisaata kingorna KNAPK oqallinnermik naammagiliivoq. Kattuffik isumaqarpoq saarulleqassuseq pillugu paatsiveerusimaarneqartorujussuusoq, taamaattumillu TV-iikkut radiukkullu aalisartut, politikerit biologillu toqqaannartumik oqallitsinneqarnissaannik kaammattuuteqarluni.

Aalisartut piniartullu kattuffiata Pinngortitaleriffik saarulleqassutsimik innuttaasunut paatsiveerussaarisutut pasillerpaa.

- Pinngortitaleriffimmi biologit saarulleqassuseq pillugu innuttaasunut, minnerunngitsumillu Inatsisartuni politikerinut, Naalakkersuisunut ilaasortanik maanna isornartorsiuisunut, paatsiveerutsitsivoq. Taamaattumik tamanna qisuariarfigisariaqalerparput, KNAPK-meersoq Henrik Sandgreen tusagassiuutinut nalunaarummi oqarpoq.

Atuaruk: Aalisarnermut Siunnersuisoqatigiit Krusep saarullittassiinera illersorpaat

Sinerissap qanittuani saarullippassuaqartoq

KNAPK tusagassiuutinut nalunaarummi erseqqissaalluni allappoq, sinerissap qanittuani saarullippassuaqarneranik, ullormullu saarullippassuit pisarineqartarnerannik.

- Sinerissap qanittuani ima saaruleqatigaaq, bundgarnini ataatsini ullormut 56 tonsit pisarineqarsinnaallutik, KNAPK-p siulittaasua tusagassiuutinut nalunaarummi allappoq.

KNAPK-llu siulittaasua ingerlaqqippoq:

- Avataasiorluni ukiumut saarullittassiissutit 25.000 tonsinik amerlassusilerneqarmata biologit oqarput avataani saarullippassuaqartoq. Kisianni sinerissap qanittuani amerlavallaanngitsut, Henrik Sandgreen nassuiaavoq.

Atuaruk: Naalakkersuisooqataasut Karl-Kristian Kruse akerlilerpaat

KNAPK isumaqarpoq paasissutissat eqqortut oqaluuserineqarnissaat pisariaqartoq, oqallinnissamillu kaammattuuteqarluni.

KNAPK TV-iikkut aamma imaluunniit radiukkut toqqaannartumik ammasumik oqallittoqarnissaanik, aalisartut, politikerit biologillu peqataaffigisaannik, siunnersuuteqarpoq, tamannalu tusagassiuutinut nalunaarumi atuarneqarsinnaavoq.

Aamma atuakkit:

Atassut isumaqarpoq saarullinnik pisassiineq akisussaassuseqanngitsoq

Demokraatit siulersuisuunerini isumaqatigiinnginneq

Powered by Labrador CMS