KNAPK: Royal Greenland naak?

KNAPK´p ilungersorluni Royal Greenland akimik isumaqatigiissuteqarfiginiaraluarpaa, isumaqatiginiagassalli nunani allani angalaneq pingaarnerutimmassuk, aalisartut maannamut aallartinneq ajuleqqapput. KNAPK-mi pisortap tullia Tønnes Kaka Berthelsen tusagassiorfinnut nalunaarutikkut taamafut paasissutissiivoq.
– Royal Greenlandimik isumaqatigiissuteqarnissarput tamaviaarukkaluarparput, isumaqatigiinniaqatissattali nunanut allanut angalaneq pingaartinnerugunarmassuk aalisartut tunulliunneqarput aalisalersinnaanatillu. Piumasarigaluaparpummi suanniarneq aallartitsinnagu isumaqatigiissuteqartoqassasoq, taanna oqarpoq.
Royal Greenland KNAPK-lu kingullermik ataatsimeeqatigiipput sisamanngornermi apriilip pingajuanni, kinguneqanngitsumik.
– Kingorna KNAPK-p naapitsiniaalluni akimik siunnersuutaa akineqarneq ajuleqqavoq pisortaq, Lars Nielsen, Canadamut angalarpalummat. Ukiorsuaq sivisoqisoq aalisartorpassuit tunisiffissaqaratik arnarlunniarnerup aallartinnissaa utaqqivaat, maannalu isertitsilaarnissamut piffissanngormat isumaqatigiinniarneq ingerlasinnaanngimmat aalisartut ajalusoorput, Tønnes Berthelsen oqarpoq.
Tønnes Kaka Berthelsenip ilanngullugu oqaatigaa KNAPK-p piumasaqaataa islandimi akigititamit 7 koruuninik, norgemilu akigititamit 12 koruuninik appasinnerusoq. Piumasaqaatip taama appasitsigineranut pissutaavoq Kalaallit Nunaanni tunisassiornermut aningaasartuutit nunanut sanilliuffigisinnaasatsinnut sanilliullugit qaffaseqimata.