Akerliuneq
KNAPK: Pisassiissutit utertinneqassappata mianersuaalliornerussaaq
KNAPK-p paasissutissaatai aallaavigalugit, Naalakkersuisut raajanut pisassiissutit tamaasa taamatullu sinerissap qanittuani qaleralinnut pisassiissutit tamaasa utertissallugit pilersaaruteqarput. Kingunerluuteqarsinnaanerali suliniaqatigiiffiup ernummatigaa.
Rajaanut pisassiissutit tamaasa sinerissamilu qanittumi qaleralinnut pisassiissutit tamarmik, aalisarnermut inatsit suliarineqartoq akuerineqassappat tamarmik utertinneqassapput.
Tamanna pisortatigoortumik nalunaarutigineqarsimanngikkaluarpoq, kisianni KNAPK-p paasissutissat taakku pissarsiarisimagaat, Henrik Sandgreenip oqaluttuaraa.
- Tamanna piviusunngussappat, ilaasortatsinnut inuiaqatigiinnulli annertuumik kingunerlutitsisussaavoq, Henrik Sandgreen Sermitsiaq.AG-mut oqarpoq.
- Aalisarneq 1,7 milliardit koruuninik nalilik eqqartorparput.
Ataatsimoorussamik akerliliineq
Naalakkersuisut pilersaarutaannik paasisaqarneq pillugu KNAPK Sulisitsisullu malitsigisassai pillugit taakku ataatsimoorussamik akerliussuteqarfigaat.
Aamma atuaruk:
- Naalakkersuisunit paaserusupparput qanoq periutsimik pilersaaruteqarnersut aammalu pisassiissutit utertinneqarsimasut qanoq agguarneqarniarnersut, Henrik Sandgreen oqarpoq.
Taamatut utertitsisoqassappat KNAPK-mi ilaasortanut arlalinnut kingulernitsitsisinnaasoq, taassuma nassuiaatigaa. Arlallit angallataatiminnik atortunillu iluarsartuussinissaminnik pisariaqartitsipput. Taakkununnga tunngasunik aningaasanik atorniassagunik, pisassiissutit pissarsiarisimasatik qularnaveeqqutitut atortariaqarsinnaavaat.
Ataatsimoorussamik aaqqiineq
Pisassiissutit utertinneqarnissaannut Henrik Sandgreenip paasisai aallaavigalugit, aalisarnermut inatsissami qanoq pisasseeriaaseq ingerlanneqartassanersoq suliniaqatigiiffinnit isumaqatigiissinnaannginneq pissutatinneqarpoq.
- Piffissaqarnerusimangutta, aaqqiissutissamik nassaarsimasinnaangaluarpugut, KNAPK-p siulittaasua naqissusiivoq.
Immikkut pisassiisutit
Sinerissap qanittuani qaleralinnut pisassiissutaasartut pillugit, massakkut paggatassiinikkut pisassiissutigineqartut immikkut pisassiissutigisalernissaat, atorfissaqartikkunnaaraannilu tuniniarneqarsinnaasunngorlugit, piffissami sivisuumi KNAPK-p sulissutigisimavaa.
Taamatut aaqqiineq, pisassiissutit tamaasa uterteqqaanngikkaluarlugit, aalisarnermut inatsisissami ilaatinneqaannarnissaa, Henrik Sandgreen isumaqarpoq,
Aalisarnermut Piniarnermullu Naalakkersuisoq, Karl Kristian Krusep (S) oqaaseqartinnissaa Sermitsiaq.AG-p sulissutigaa.