qinersineq
KNAPK: Pasilliutitsinnut uppernarsaatissaqanngilagut
Aalisartut piniartullu kattuffiata politiinut tunniunneqarsinnaanertik tikilluaqquaat, taamaaliornikkut pasilliutitik uppernarsaatissaqanngitsut qulaajarneqarsinnaaniassammata
Aalisarnermut, Piniarnermut Nunalerinermullu Naalakkersuisoqarfiup aalisartut piniarnertullu kattuffiat politiilersuutissanerlugu isumaliutigaa, kattuffik uppernarsaatissaqanngitsunik tusagassiortunik katersortitsinermini naalakkersuisoqarfiup atorfilittai savalimmiormiut avaleraasartuunut pisassiissutinik nunaqqatiminnut tunniussaqarsimasutut pasillereeraalu.
- Aalisarnermut, Piniarnermut Nunalerinermullu Naalakkersuisoqarfiup akuersaarsinnaanngilluinnarpaa KNAPK-ip Naalakkersuisoqarfimmi atorfilittanut, nunanit allaneersunut, pasilliinera. Kattuffik isumaqarpoq atorfilittat nunanit allaneersut nunaqqatitik salliutillugit pisassittaraat. Naalakkersuisoqarfiullu nunat allamiut aalisariutinik piginnittui ukioq manna avaleraasartoortassanik pisassiinermi salliutittaraat kalaallinit pigineqartut pingaarnerutinneqassanatik, Aalisarnermut, Piniarnermut Nunalerinermullu Naalakkersuisoqarfimmi pisortaq Jørgen Isak Olsen, tusagassiutinut nalunaarummi marlunngornermi allappoq.
Atuaruk: KNAPK pingaarutilimmut aggersaavoq
Atuaruk: Aalisarnermut Naalakkersuisoqarfiup KNAPK isornartorsiorpaa
Politiinut tunniunneqarsinnaaneq tikilluaqqugaat
Aalisartut piniartullu kattuffiata tusagassiortunik katersortitsinerminni saqqummiussaminni naqissuserpaat 'Naalakkersuisoqarfiup maannamut nunami allamiunut nunatsinnut attuumassuteqanngitsunut nunaqqatiminnut pisassiissutigisalermatigit – tamarmik taamaattut uppernarsaatissartaqarput’.
Kisianni Knapk-p siulittaasuata Henrik Sandgreenip maanna nassuerutigaa kattuffik tigussaasunik uppernarsaatissaqanngitsoq atorfilittanut savalimmiormiunut nunaqqatiminnik avaleraasartoorniarnissamut pisassiissutinut salliutitsinerarlugit pasilliuteqarnerminnut.
- Tassa tusagassiortunik katersortitsinermi uppernarsaatissaqanngitsunik pasilliuteqarsimavusi, naak saqqummiussassinni allakkaluarissi uppernarsaatissaqarlusi?
- Inuit ataasiakkaat suut suliarisimaneraat uppernarsarsinnaanngilarput. Aamma ilisimanngilarput qanorpiaq sunalu pissutigalugu itigartitsisoqarsimanersoq. Takusinnaavarpulli nunatsinneersut aalisartuiit avaleraasartoorniarnissamut qinnuteqaraluarmata itigartinneqarsimasut, akerlianillu savalimmiormiut tunineqarlutik.
Uppernarsaatissaqanngillat
- Sooruna uppernarsaatissaqanngitsunik saqqummiussivisi?
- Isigisagut malillugit allatut eqqarsarnissaq ajornarpoq.
- Politiinut tunniunneqarnissamut siorasaarneqarnersi qanoq tiguvisiuk?
- Qujanaannarpoq taamaaliortoqassappat. Imaallaat pisut qulaajarneqassapput.