ukiortaami oqalugiaat
KNAPK-p siulittaasua: Nunap siunissaa immeraassutigineqarpoq
Aalisarnermut inatsisissatut siunnersuut nunap siunissaanik immeraassutiginninnerusoq, aalisartut piniartullu kattuffiani siulittaasup Henrik Sandgreenip oqaatigaa.
KNAPK-p siulittaasua Henrik Sandgreen ukiortaamut isinngilaattaa ukiortaami oqalugiaammini aalisarnermut inatsit oqaaseqarfigaa.
Inatsisissatut siunnersuummi immikkoortut pingasut
Henrik Sandgreenip aalisarnermut inatsit arlalitsigut ajunngitsortaqartoq ukiortaami oqalugiaammini allappaa. Aalisarnermullu inatsisissatut siunnersuummi qulequttat pingasut Inatsisartut ukiaanerani ataatsimiinnerminni siullermeersimasaanni qulequttat pingasut isornartorsiorpai.
Inuussutissarsiortut kattuffii Aalisarsarnermut siunnersuisoqatigiinni ilaasortaatitaat ikileriartut.
- Maanna KNAPK aamma GE tamarmik pingasunik immikkut taasisinnaapput, siunissami tamanna allanngortinniarneqarpoq kattuffiit tamarmik katillugu pingasuinnarnik sinniiseqalissapput avataaniillu allanik pingasunik Naalakkersuisut toqqaasalerniarput. Tamanna KNAPK-mit akueriuminaatsinneqarluinnarpoq, siulittaasoq erseqqissaavoq.
Inatsit tunngaviusoq unioqqutinneqartoq
Nakkutilliisut nutaat KNAPK-p ernumanartoqartillugu aappaattut taavaa.
- Nakkutilliisut inuit taakku ”pasineqartut” illuinut / quiinut iserlutik – oqarluaannaraanni - qerititsivii ammarlugit misissorsinnaalissammatigit. Kattuffimmiit isumaqarpugut tamanna Inatsimmi pingaarnermi paragraffit ilaannik, tassa angerlarsimaffik tassaasoq naalagaaffiup susassarinngisaa, innarliinerusoq. Tamannalu KNAPK-p akuerinngilluinnarpaa, Henrik Sandgreen erseqqissaavoq.
Piffissamilu killiligaanngitsumi raajartassiissutit utertinneqarniarnerat KNAPK-p siulittaasuata aamma apeqquserpai.
- Pisassiissutit piffissamik killiligaanngitsut inatsisiliornikkut killiliiffigeriarlugit ”inuiaqatigiinnut angerlaanniarneqarnerat”, maannakkut ingerlatsisuusut inuiaqatigiinni ilaasimannginneramik? Taannaavorlu tassa kattuffiup nuannarinngiluinnagaa. Angerlaanneqarpata taava susoqassava? Kikkut taava pisassiissutit tigummilissavaat? Arsaarneqartut taarsiivigineqassappat qanorlu akilerneqassappat? Apeqquterpassuupput ullumannamut suli akineqanngitsut. Inatsisilioraanni minnerunngitsumillu inuiaqatigiit kalaallit aningaasaqarneranni annertunerpaamik aningaasanik isaatitsiviusoq pineqarpat taava pinngitsoorani iluamik iternga tikillugu misissueqqissaaqqarluni saqqummiussisoqaqqaartariaqartoq kattuffik isumaqarpoq, Henrik Sandgreen oqarpoq ilassuteqarlunilu:
Raajarniarneq akerleriiffiusoq
- Ajoraluartumik suliami pineqartumi taamaaliortoqanngilaq, imaappoq allaat oqartariaqarluni inuiaqatigiittut siunissarput immeraassutigineqarpoq. Naluarput silatusaarnerunersoq imaluunniit inuutissarsiut ”raajarniarneq”
maanna nunarsuarmi pitsaanerpaatut taaneqartariaqartoq aserortilernerlutigu, tassa taamak ajoraluartumik inissisimavugut, Henrik Sandgreen erseqqissaavoq.
Utoqqalinersianik katersaqalernissaq akitsuutillu ukiortaami oqalugiaammi siulittaasup eqqaavai. Taanna isumaqarpoq, akitsuutit qaffasinnerulertariaqanngitsut. Killormuanilli akitsuutit apparneqarnissaat pissusissamisoortoq, siulittaasoq ukiortaami oqalugiaammini erseqqissaavoq.