akinik qaffaasoqareersoq
KNAPK Naalakkersuisunut: Akinik qaffaanerit iliuuseqarfigineqartariaqarput
Orsussanik qaffaasoqarnera KNAPK-mit annilaanganartoqartinneqarpoq
- Akisussaaffimmik tigumiarnersi ilisimaaralugu, nunatta inuussutissarsiutituarsuanik aamma ajutoortitsisinnaasoq pisoq piaarnerpaamik kingusinaartigasi aaqqiivigisariaqarparsi.
KNAPK-p siulittaasua Henrik Sandgreen Naalakkersuisunut kaammattuuteqarpoq.
KNI A/S Polaroil aggustip aallaqqaataa aallarnerfigalugu ikummatissanik qaffaanera Atassummit SIK-mit maannakkullu aamma KNAPK-mit isornartorsiorneqarpoq.
Inuiaqatigiinnut equngasumik eqquisinnaanera ernumassutigineqarpoq, tassanimi illoqarfinni mikinerusuni kiisalu nunaqarfimmiut eqqorneqarnerpaajusussaammata.
Ilaqutariit eqqorneqassapput
Orsussanik qaffaanerit ukiuni kingullerni annertusiartuinnartut KNAPK-mit maluginiarneqarpoq.
- Aalisartut piniartullu benzina, solaaq aamma petroliu pinngitsoorsinnaanngilaat ulluinnarni inuussutissarsiumminnik ingerlataqarnerminni, aammalu angerlarsimaffimmi atugassatut ilaqutariittut kiassaatitut, Henrik Sangreen oqarpoq.
Akit qaffanneqarmata dieseli gasuulialu 54 øremik akitsorlutik 611 koruuniniit 6,65 koruuneqalerput, benzina 39 øremik akitsorluni 6,11 koruuniniit 6,50 koruuneqalerpoq, petruuliulu 55 øremik akitsorluni liiterimut 6,21 koruuniniit 6,76 koruuneqalerpoq. Akinut ilaapput avatangiisinut akitsuut 10 øre.
Ukioq kingulleq juunip arfineq aappaanni kingullermik akinik nalimmassaasoqarpoq.