Aalisarneq
KNAPK: Killeqanngitsumik aalisarfiit paggatassiisarnerlu atorunnaarsinneqarlik
Killeqanngitsumik aalisarfiit KNAPK-p akerlerai. Kattuffillu maanna, aalisagatassiissutinik qaffaasoqalaarnissaa kissaatigalugu, erseqqissaassuteqarpoq
Aalisagartassiissuteqarfiusuni killeqanngitsumik aalisartitsisarneq ileqqupalaajuvoq. Killeqanngitsumik aalisartitsiviit 2014-imi Inatsisartunit akuersissutigineqarmata, KNAPK taama oqariartuuteqarpoq. Siulittaasulli Henrik Sandreenip taanna akuttunngitsumik oqaatigisarsimavaa.
KNR naapertorlugu killeqanngitsumik aalisarfiit atorunnaarsinneqarnissaat, Naalakkersuisut aalajngeqqammerpaat.
Qaffaalaarneq
Henrik Sandgreen massakkut isumani itisilerpaa, atorunnaarsitsinermilu aalisartut aaqqiivigineqartariaqartut, tusagassiuutinut nalunaarutigalugu. Tamanna ilaatigut aalisagartassiissutinik qaffaalaarnikkut pissaaq.
- Qaleralinnik aqutsiveqarfinni Qeqertarsuup Tunuani, Uummannami Upernavimmilu KNAPK-miit innersuussuteqarsimavugut 10.000 tonsinik taannalu ukuninnga tunngaveqarpoq, taanna allappoq.
Tassa Naalakkersuisut akuerisimasaannik aalisagartassiissutinik qaffaalaarnissaq pineqarpoq. Pineqartut tassaapput Uummannami 9.500 tonsit Upernavimmi Qeqertarsuullu Tunuani 9.200 tonsit. Biologillu sumiiffinnut taakkununnga pingasunut innersuussutigimasaannit 6.000 tonsinik amerlanerulaarput.
Immikkut aalisagartassiineq
KNAPK-llu, tamatumani sinerissap qanittuani qaleralinniarneq allanngortitsivigineqarnissaa aamma, piumasaraa.
Paggatassiisarnerillu atorunnaarsinneqarnissaat, kattuffiup kissaatigaa. Tassa sumiffinni aalisartut qaammatikkaartumik pisassittarunnaarlugit, tamarmik immikkut pisassinneqartalernissaat eqqunneqassaaq.
- Angallatit (6 meterimiit takinerusut) umiatsiaaqqallu (6 meterimiit naannerusut) tamarmik niiverutaasinnaasunik pisassaateqartinneqalernissaat kissaatigigatsigu. Umiatsiaaqqat IOK-nik (Ataasiakkaat niuerutaasinnaasunik pisassinneqarneri) pisassaqalerpata akilersinnaasumik aalisarsinnaasariaqarput, akuersissutillu tunniunneqarsimasut amerlassusii eqqarsaatigalugit allatut ajornartumik pisassiissutitigut aaqqiivigineqartariqarlutik, Henrik Sandgreen allappoq.
Tassa IOK-t atorlugit aalisartut ataasiakkaat nammineerlutik aalisarnertik aqussinnaanerulissavaat. Aalisarunnaarniarlunilu kissaateqaleruni utoqqalinersiaqaleruniluunniit aalisagartassani tunisinnaavai.
- Naatsumik oqaatigalugu assiigiissakkamik, eqaatsumik malinneqarsinnaasumillu aqqutsineq ujartorparput. Killeqanngitsumik aalisartitsiviit atorunnaarsinneqarnissaat kissaatigaarput pissutigalugu aalisarnerit tamarmik inatsisitigut aqunneqarlutik ingerlasariaqarmata, aammali angallataatillit IOK atorlugit niueruteqarsinnaaneri qularnaveeqquteqarsinnaaneriluunniit killeqanngitsumik aalisartitsiveqarnikkut assut innarlerneqarmata, Henrik Sandgreen naggasiivoq.