Tatiginninnginneq
KNAPK ileqimisaartorpoq
Naalakkersuisut aappaagumut aalisarnermut aningaasaliissutissatut immikkoortinniagaatr 15 millioner koruunit Aalisartut Piniartullu Kattuffiata tatiginartippallaanngilaa
Siorna tamatumunnga aningaasaliissutit 20 millioner koruuniusimapput, isumaqarsimavugullu ikippallaartut. Ukioq manna aningaasaliisoqanngilaq, aappaagumullu 15 millioner koruuninik aningaasaliiniarput. Politikkikkut sangujoraartumik ingerlatsineq ileqimisaartuinnagassaavoq, KNAPK-mi pisortaq Petrus Biilmann oqarpoq.
Ukiut tamaasa aalisarnermut aningaasaliissutaasartut assortuussutaajuartut, atorneqartarput aalisariutit sinerissamut qanittumi aalisartut ataavartumik taarserarnissaannut nutarternissaannullu, aammalu suliniutinut nutarsaasunut, misileraalluni aalisarnermut ilaallu ilanngullugit, aalisakkanik pisuussutit amerliartornissaannut atorneqarnerannullu iluaqutaasutut isigineqartunut.
Naalakkersuisut aningaasaliissuteqarnermikkut aamma kissaatigaat angallait atorunnaarsinnissaannut aningaasassaqarnissaq, tamatumuunakkut sinerissamut qanittumi aalisarnermi angallatit atorneqartut naleqqussarnerat oqilisarniarlugu. Aningaasat immikkoortinneqartut angallatit, sinerissamut qanittumi aalisarnermi atorneqartut, isaterlugit atorunnaarsinneqarnerannut tapiissutitut atorneqqarsinnaapput. Tapiissutissat immikkoortinneqarput angallatinut, sinerissamut qanittuani aalisarnermut atorneqartunut ukiullu 25-t sinnerlugit pisoqaassusilinnut, aserfallatsaalissallugit akisuvallaartutut nalilerneqartunut.
– Sinerissamut qanittumi aalisartuvut 2400-t angallamminnik atortuminnillu aserfallatsaaliinissamut nutarterinissamulllu aningaasanik atorniarsinnaasimanngillat, tamanna atorfissaqartinneqartorujussuugaluartoq. Politikkikkut sangujoraartumik ingerlatsineq pissutigalugu pilersaarusiornissaq ajornakusoorpoq, Petrus Biilmann nassuiaavoq.
Politikkikkut sangujoraartumik ingerlatsineq pillugu KNAPK-p qanoq oqarnera, aalisarnermullu partiini politikkit qanoq kinguneqarsinnaanerat Sermitsiaq normu 36-mi ataani annertunerusumik atuaruk