KNAPK GE-lu: Naalakkersuisut Kalaallit Nunaanni inuussutissarsiutit pingaarnersaannik aseruilertoq

Raajanut pisassiissutit Naalakkersuisunut utertinneqarnissaat pillugit, KNAPK Sulisitsisullu Naalakkersuisunut akerliussuteqarput

Aalisakkerinermik suliaqartut Naalakkersuisunut akerliupput.

Pisasseeriatsip allannguuteqarnissaanut pilersaarutit pillugit, taakku akerliulersimapput.

Allannguutissatut pilersaarutit atuutilerpata, raajanut pisassiissutit Namminersorlutik Oqartussanut utertinneqassapput.

- Soorunami aallarniutaasumik aalisariutaatillit inatsit allanngortinneqarpat allannguut malugeqqaartussaassavaat, tassa pisassatik annassahgamikkit. Kisiannili aamma aalisarneq inuussutissarsiutitut inuiaqatigiit aningaasaqarniarnerannut imatut pingaaruteqartigaaq, naggatatigut ajorsartitaasussaq tassaassalluni Nunatta Karsia inuiaqatigiillu kalaallit tamakiiisumik isigalugit, KNAPK-p siulittaasua, Henrik Sandgreen Sulisitsisulli siulittaasuat Henrik Leth ataatsimoorlutik taama oqaaseqarput.

Taamatut ataatsimoorluni akerlilersuilerneq KNAPK-ip raajat pillugit siunnersuisoqatigiivinit pilersitaavoq, tamannalu Sulisitsisut Peqatigiiffiaata ataani aalisarneq, inuutissarsiorneq avammullu tunisassiorluni niuerneq pillugit brancheudvalgimik ataatsimeeqateqarnermi akuersaarneqarpoq. Suliniaqatigiiffiit taaneqartut ataatsimut avataani sinerissamullu qanittumi raajarniarnerit tamaasa tigummisarivaat.

- Uagut ilaasortarisagullu isumaqarpugut – immikkut ilisimasalippassuit oqarnerisulli – maanna ingerlatseriaaseq atorneqartoq anguneqarsinnaasuni pitsaanerpaajusoq, suliffeqarfiit aningaasaliisinnaassusiinut aammalu niuiaqatigiinni aningaasaqarnermut. Taamatullu aamma ippoq Attuumassuteqanngitsumik Ataatsimiititaliap kiisalu Aalisarnermut Inatsit Pillugu Ataatsimiititaliarsuup pingaarnertut isumaliutissiisusiamminni naliliinerat, siulittaasut marluullutik taama allapput.

Suliniaqatigiiffiit taakku aalisarnerup iluani mississuititsisoqarnissaa isumaqatigiissutigivaat, tassani ingerlatseriaatsip tigummiinnarnissaanik oqariartuuteqarnermut atatillugu sallerpaatut suliniutit tassaammata sapinngisaq tamaat nalilersuinerit paasititsiniaanerillu.

Tamanna Aalisarnermut inatsit Inatsisartut ukiaanerani suliarineqannginnerani, Inatsisartut Naalakkersuisulli septembarimi ingerlanneqartussami isumasioqatigiiffiginerisut pissaaq.

- Oqaaseqaratami isiginnaaginnarsinnaanngilarput, politikkikkut suliniutip Kalaallit Nunaanni inuussutissarsiutit pingaarnersaannik aseruisinnaanera isiginnaanginnarsinnaanngilarput, Henrik Sandgreen aamma Henrik Leth taama isumaqarput.

Raajat nunatsinni avammut tunisaanersaapput, avammummi tunineqartartuni isertitat affangajaat raajaninngaanneersuupput.

Powered by Labrador CMS